Nga Boldnews.al
Në një kohë që automjetet e Policisë së Shtetit bëjnë patrullime të cunguara, për shkak të mungesës së karburantit, Policia e Shtetit do të shesë naftë. Në media janë publikuar foto dhe video të automjeteve të policisë që shtyhen nga policët për mungesë të lëndës djegëse. Por, edhe dokumente policore që tregojnë se “x apo y operacion apo x apo y person nuk u kapën se makinat s’kishin karburant”. Dhe, në gjithë këtë situatë, drejtori i ri i Policisë së Shtetit, Muhamet Rrumbullaku, ka firmosur bërjen e një ankandi; shitjen e karburantit! Një paradoks i madh, që tregon të dyja anët e katandisjes së policisë. Po nëse makinat s’kanë naftë, përse shitet? Dhe, nëse kjo lëndë djegëse s’është në parametrat e duhur, kush e prishi?! Përse nuk iu dha makinave kur ishte e mirë?
Sipas dokumenteve që disponon redaksia e BoldNews.al, Policia e Shtetit ka hapur një ankand për shitjen e karburantit të mbetur stok çuditërisht në magazinat e tyre. Dokumenti i mësipërm është publikuar ditët e fundit në Agjencinë e Prokurimit Publik dhe është njoftimi i Policisë së Shtetit. “Autoriteti shitës: Drejtoria e Përgjithshme e Policisë së Shtetit. Data e zhvillimit të ankandit: 28.08.2023, ora 10:00” thuhet në këtë dokument. Mësohet se është një procedurë e hapur, teksa objekti është “shitje karburanti”.
“Përshkrim i shkurtër i objektit të shitjes: Objekti i shitjes është i magazinuar prej vitesh në magazinat e Drejtorisë së Menaxhimit të Mjeteve të Transportit dhe është cilësuar si jashtë standartit të përdorimit. Më konkretisht është në sastë loti i parë, benzinë lëng 5.531 litra dhe loti i dytë naftë lëng 13,961 litra” thuhet në këtë dokument. Pra, në total rreth 20 mijë litra. Nëse do të ishte me cilësi të mirë sot do të kushtonte 35 milionë lekë. Por, në dokumente, Policia e Shtetit thotë se e ka nxjerrë në ankand me një shumë prej 25 milionë lekësh. “Vlera fillestare është benzinë lëng me vlerë 659.118 lekë dhe naftë lëng me vlerë 2.023.786 lekë pa Tvsh. Vendi i zhvillimit të ankandit te Drejtoria e Përgjithshme e Policisë së Shtetit” thuhet në këto dokumente.
Por, përpos vlerës, e çuditshmja e këtij ankandi është se përse është mbajtur një sasi e madhe karburanti në magazina kur makinat s’kishin lëndë djegëse? A ka persona përgjegjës për këtë situatë? Kemi një dëm ekononik, një dëm imazhi apo edhe papërgjegjshmëri të të gjithë kupolës së Policisë së Shtetit.
