Ndërsa merkato ende nuk është mbyllur dhe ai është një nga sulmuesit më të lakuar gjatë ditëve të fundit në aksin Londër-Milano, Armando Broja po bën maksimumin për t’u rikthyer sa më parë në fushën e lojës pas dëmtimit të gjatë, i cili po e mban jashtë fushe që prej dhjetorit të vitit të kaluar.
Këtë të martë, sulmuesi i Kombëtares shqiptare ka postuar një foto në Instagram, ku duket se është bërë pjesë e skuadrës në një ndeshje brenda grupit, ndërsa ka vendosur edhe një kronometër për të treguar se tashmë ora po afron për të që të rikthehet sërish në fushën e lojës.
Ndërkohë, mediat angleze shkruan këtë të martë se Chelsea i ka mbyllur derën Milanit për një huazim të mundshëm të shqiptarit. Kjo për shkak se talenti 21-vjeçar konsiderohet pjesë e projektit të Maruicio Pochetino për sezonin e ri, ndonëse londinezët pësuan shumë ndryshime këtë verë. Për shqiptarin kishin shfaqur interes disa klube të mëdha europiane, me Milanin që kryesonte listën, por edhe West Ham që prej kohës e kërkonte talentin shqiptar në formë huazimi me opsionin e blerjes përfundimtare pas një viti.
Megjithatë, kjo nuk i ka bindur drejtuesit e Chelsea, që e koniderojnë Brojën një talent premtues për të ardhmen dhe janë të sigurt për ta mbajtur në “Stamford Bridge”. Jo vetëm kaq, por londinezët kanë refuzuar dhe mundësinë për të marrë Dusan Vlahovic në skuadër, si pjesë e shkëmbimit me Lukakun, çfarë të bën të mendosh se drejtuesit e klubit nuk kanë ndërmend për të firmosur me një sulmues qendre këtë verë.
