Kryeministrja italiane Giorgia Meloni ka mbërritur rreth orës 17:15 të pasdites së sotme në Vlorë, pasi udhëtoi nga Puglia, ku ishte duke pushuar në një vilë me vajzën dhe partnerin.
Sipas mediave italiane, ajo është ftuar nga homologu i saj shqiptar për një ndalesë në vilën qeveritare ku kryeministri Edi Rama po qëndron në jug të vendit. Kryeministrja italiane është pritur në portin e Vlorës nga vetë Rama dhe pjesëtarë të konsullatës në qytetin bregdetar.
Meloni pritet të qëndrojë në rivierën shqiptare për vizitën e saj jo zyrtare më pak se 24 orë, pasi ditën e nesërme do të rikthehet sërish në Puglia sipas TGCom24.
Meloni u nis në mesditë nga Brindisi me një traget të linjës dhe për mbërritjen e saj, policia e qytetit bregdetar ka marrë të gjitha masat për ruajtjen e rendit dhe sigurisë.
Në Portin e Vlorës konstatohet prezencë e shtuar e forcave të policisë, ndërsa në gatishmëri është vendosur edhe një ambulancë.
Numër i lartë efektivësh është stacionuar edhe pranë godinës së konsullatës italiane në Vlorë, që ndodhet në zonën e Lungomares.
