Në protestën që është zhvilluar pasditen e sotme në Himarë në mbështetje të kryebashkiakut të zgjedhur Fredi Beleri, sekretari i organizatës minoritare “OMONIA” i është drejtuar me tone të ashpra kryeministrit Edi Rama.
Marin Suli teksa kërkoi lirimin e Belerit, u shpreh: “Lirojeni Belerin, sa nuk ju ka marrë përpara zemërimi i himarjotëve”.
Ai shtoi më tej se Rilindja nuk do të mund ta mbajë dot gjatë pas hekurave me burg politik, Belerin, dhe se në ditën që ai do të lirohet sheshi ku po zhvillohet protesta do të quhet “Sheshi i Lirisë”.
“Nga sot falë jush ky shesh ka një emër të ri, është sheshi i dinjitetit të lirisë. Ditën e parë të lirisë së Fredi Belerit, ky shesh do të mbajë emrin e “Shesh i Lirisë”. Dua të ju falënderoj për shansin që na keni dhënë fuqi për të drejtuar Himarën për katër vitet e ardhshme. Vullneti i shumicës për fat të keq u nëpërkëmb duke mbajtur në burg Fredi Belerin.Burgu politik dhe rilindas nuk do ta mbajë dot gjatë Belerin. Ai do të jetë kreu i Bashkisë së Himarës. Dora e zezë e zuzarëve nuk do ta mbajë larg kryetarin nga zyra e Bashkisë. Fitorja jonë, fitorja e Fredit është e padiskutueshme. Janë 4 mijë himarjotë që kanë votuar për Belerin. Lirojeni para se të ju marrë zemërimi i himarjotëve. Ne e kemi zgjedhur fatin tonë dhe drejtuesin tonë”, tha ai.
