Ndërkohë që të akuzuarit për ngjarjet e përgjakshme të një jave më parë në lagjen “Nea Philadelphia” të Athinës, që çuan në vrasjen e tifozit 29-vjeçar të AEK-ut Michalis Katsouris po transferohen në burgjet helene pas gjyqit të së hënës, një video e re që tregon momentin e goditjes fatale ndaj të riut është publikuar nga mediat greke.
Në pamjet e bëra publike nga SKAI, 29-vjeçari Michalis Katsouris shihet i veshur me këmishë blu dhe tenton ti shpëtojë huliganëve kroatë.
Më pas viktima shihet duke u goditur me shkop, pasi ka marrë goditje me thikë nga grupi i huliganëve që po ndiqnin me vrap ultrasit e AEK
Pak më vonë ai shihet duke hequr kaskën e motorit që mban në kokë dhe duke parë dorën e majtë.
Më pas i riu vrapon në një kioskë, ku fshihet pas një frigoriferi akulloresh.
Kjo është edhe pika ku 29-vjeçari rrëzohet dhe merr frymë për të fundit herë, pasi ka marrë plagën vdekjeprurëse me thikë.
Përveç kësaj video, edhe të gjitha pamjet e tjera të gjetura në celularët e sekuestruar, si dhe imazhet e kamerave të sigurisë së zonës janë ende në mikroskopin e policisë.
Duke qenë se arma e krimit nuk është gjetur ende, hetuesit që merren me çështjen besojnë se përgjigjet se kush qëndron pas vrasjes së të riut do të jepen nga mostrat e materialit gjenetik që do të mblidhen nga të arrestuarit.
Megjithatë, nga të dhënat e deritanishme, autoritetet greke që po trajtojnë rastin në fjalë kanë shënjestruar pesë persona të cilët konsiderohen të dyshuar kryesorë për vrasjen. Aty përveç tre grekëve dhe një kroati, bën pjesë edhe një i ri shqiptar.
