Një krim shumë i rëndë ndodhi në fshatin Zëmblak të Maliqit më 29 Korrik. Luiza Mullali, 46 vjeçe u vra nga bashkëshorti i saj Gjergji Mullali. Ky i fundit vrau veten një ditë më pas.
Kjo ngjarje e rëndë tronditi opinionin publik në të gjithë Shqipërinë. Emisioni “Uniko” solli detaje të reja në lidhje me këtë rast. Në studio ishin ftuar dy vëllezërit e Gjergjit, Gazmond dhe Arben Mullalli.
Arbeni tregoi se kjo ngjarje mund të parandalohej. Ai u shpreh se familja Mullalli i ka kërkuar familjes së Luizës që ta bisedonin këtë problem, por është refuzuar nga babai i saj. Sipas tij, Luiza nuk e dëgjonte Gjergjin.
Ai rrëfeu edhe një episod që sipas tij, ka ndodhur disa vite më parë kur po shkonin në fshatin Pojan. Arben Mullalli rrëfeu se të gjithë u alarmuan kur panë Luizën të sëmurë dhe që nxirrte shkumë nga goja, por më pas në taksi, ajo hipi me këmbët e veta. Sipas Arbenit, doktori ka thënë që ajo bënte vetë dhe nuk kishte asnjë problem.
Arben Mullalli: Mund të parandalohej. Nuk e mbaj mend vitin, i kemi kërkuar të atit të vajzës, kishim ca probleme dhe të vinin të bisedonin. Përgjigja e tij e parë ishe, vajza ka tre fëmijë, atje të bëjë si të dojë, mua me këto probleme mos më thërrisni më. Fillojmë për këtë problemin e sotshëm. Babain e kemi të moshuar dhe na bie ne barra. Nga Amerika marr vëllain në telefon dhe i them meqenëse ti je nga ana që hytë mbles, thojini prapë që duam të bisedojmë që ta sheshojmë këtë problem.
Spartak Koka: Kush ishte problemi që duhej sheshuar?
Arben Mullalli: Problemi ishte ky që gruaja e atij nuk e dëgjonte.
Spartak Koka: Çfarë do të thotë që nuk e dëgjonte?
Arben Mullalli: Për shembull ikte në Greqi dhe nuk e pyeste, fare.
Spartak Koka: Këto probleme kanë lindur që në Greqi, apo u theksuan më shumë gjatë kohës kur u kthyen në Shqipëri?
Arben Mullalli: Këtë konflikt e kanë filluar pas dy fëmijëve të parë që e kuptuam ne se ata rrinin në Greqi. Ajo ka ardhur nga Greqia në Shqipëri që të martonte vëllanë në fshatin Pojan. Unë kam shkuar me makinën time, kur deri në një moment të caktuar kjo u bë e sëmurë. Na alarmoi. Dola përjashta e shikoj vëllain, e kishte marrë në krahë. Çfarë ke more? O burrë më merr fëmijët më tha mua, e kam gruan e sëmurë.
Spartak Koka: Çfarë kishte?
Arben Mullalli: Kur e shikoj në krahë kjo nxirrte shkumë nga goja, kur shikoj që e lëshoi në taksi ajo hipi me këmbët e saj. Unë mora fëmijët dhe shkova në shtëpi, ky zuri taksi. Shkuan në spital, i tha doktori këtij personi (i drejtohet vëllait në studio), ore çfarë e ke. Unë e kam kunatë tha. Kjo është mirë s’ka asgjë, ti je i sëmurë, tha, kjo bën vetë.
Spartak Koka: Janë akuza të forta këto. Unë i them ashtu siç e kam në zemër, nuk di të gënjej.
Vëllai tjetër, Gazmondi, tregoi se Gjergji jetoi dhe punoi në Greqi për 25 vite. Ai u martua me Luizën me mbles.
“Për këtë kishte hyrë vjehrri im se ish-kunatën time e kishte mbesën e të motrës”, tha ai.
Megjithatë, Gazmondi thotë se ishte e qartë se ata nuk shkonin mirë si çift.
“Morën një shtëpi më poshtë. Nuk shkonin mirë në atë periudhë. Kam qenë vetë. Ka ardhur edhe motra e Amerikës. Shikoheshim në sy, por s’ke çfarë t’i bësh. Nuk e kishin nivelin e një çifti që të bisedojnë për problemet që ka familja, për fëmijët, për ecurinë, për çdo gjë. Ne shqiptarët e kishim që pastërtia të jetë një çikë, nuk ishte në atë nivel”, tha ai.
