Ditëmn e sotme po zhvillohet seanca gjyqësore për krimin e regjistruar disa ditë më parë tek Ura e Dajlanit në Durrës, ku do të caktohet masa e sigurisë për Aldo Brahimin, 22 vjeç, banues në Lushnjë dhe Ylli Grabovarin, 45 vjeç, banues në Durrës, të cilët akuzohen se kanë vranë me thikë Luljeta Prezën, 32 vjeçe, banuese në Sukth të Durrësit.
Në një prononcim për mediat, para seancës gjyqësore nëna e Aldo Brahimit është shprehur se nëse krimin e ka bërë djali i saj “të kalbet në burg”. Ajo deklaroi se i biri kishte ikur për të mbledhur kanaçe pasi me ato siguronte jetesën. Ndërsa kërkoi që hetuesit të zbardhin të vërtetën.
“Kam ardhur për djalin, nuk e di a është e vërtetë apo jo. Të kalbet brenda nëse e ka bërë djali im, dua të verifikohet kjo akuzë. Ai mblidhte kanaçe, për tu ushqyer, nuk jemi nga Durrësi, por në Grabjan. Kemi ardhur nga Lushnja, më mori policia në shtëpi, morën edhe burrin, nuk e dija për djalin. Më pyeti ku e ke djalin, i thashë duke mbledhur pagure, se ketë bënte ai, mblidhte paguret e i sillte në shtëpi. Djali jeton me mua e burrin, nuk është i martuar”, tha nëna e 22-vjeçarit.
Sipas policisë dyshohet se vrasja ka ndodhur pas një konflikti për motive të dobëta pasi autorët dhe viktima kishte konsumuar kokainë pikërisht poshtë “Urës së Dajlanit” në vendin ku u gjet trupi i pajetë dhe e gjithë skena është parë nga tre vajza, njëra prej tyre 15 vjeçe, të cilat janë proceduar penalisht për moskallëzim krimi.
Autorët kanë dëshmuar në polici se ishin konfliktuar me 32 vjeçaren pasi ajo kishte refuzuar që tu jepte të gjithë paratë që mund të kishte bërë nga aktiviteti i saj seksual, pasi një pjesë i kishte shpenzuar në spital pasi e kishte përplasur një makinë.
“Prej muajsh ne njihemi me njëri tjetrin, konflikti ka nisur pasi nuk na ka dhënë paratë që kishte mbledhur që ti bënin bashkë me ato që mblidhnin ne duke lypur në rrugë”, kanë thënë ata.
Sipas dëshmive që i janë dhënë grupit hetimor, nga tre vajzat që kanë parë ngjarjen bëjnë me dije se sherri ka qenë për 2 mijë lekë. Dy autorët ia kanë kërkuar 32 vjeçares për të blerë ushqime por ka refuzuar. Në fillim e kanë goditur me grushte dhe më pas e kanë qëlluar me thikë e kanë ikur.
Viktima është gjetur rreth 10:35 të paradites së të mërkurës, poshtë urës së Dajlanit, teksa ishte e zhveshur. Në trupin e viktimës janë konstatuar shenja dhune, ndërsa kishte dhe plagë të rënda në gjoks dhe në bark të shkaktuar me thikë, për shkak të të cilave ka humbur jetën. Luljeta Preza ushtron prej vitesh prostitucionin, teksa për këtë vepër penale është arrestuar dhe në vitin 2014.
