Një 40-vjeçar është arrestur nga policia e Fierit, pasi lëvizte i dehur dhe me kallashnikov me vete, në qendër të Libofshës.
Në kuadër të operacionit policor të koduar “Vigjilenca”, është vënë në pranga shtetasi Emiljano Gjika, banues në Fier.
“Shërbimet e Policisë e kapën 40-vjeçarin, në qendër të fshatit Libofshë, teksa mbante me vete 1 armë zjarri kallashnikov me fishek në fole, të gatshme për qitje. Ky shtetas, sapo ka konstatuar praninë e patrullës së Policisë, ka hedhur armën e zjarrit në një kanal. Nga verifikimet e kryera ka rezultuar se 40-vjeçari në momentin e arrestimit, ishte në gjendje të dehur, rrethanë e cila rrit rrezikshmërinë e posedimit të armës së zjarrit.”- thuhet në njoftimin e autoriteteve.
Policia ka gjetur dhe ka sekuestruar armën e zjarrit dhe fishekët luftarak. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
