Pirja e ekstraktit të çajit jeshil për katër javë te njerëzit me një profil të ngarkuar kardiovaskular, duket se është në gjendje të ulë nivelet e sheqerit në gjak dhe të përmirësojë shëndetin e zorrëve duke reduktuar inflamacionin.
Sipas studiuesve të Universitetit Shtetëror të Ohajos, ky është studimi i parë që vlerëson nëse vetitë anti-inflamatore të çajit jeshil në zorrë mund të përmirësojnë rreziqet e sindromës metabolike, raportojnë mediat greke.
“Ka shumë prova që konsumi më i lartë i çajit jeshil është i lidhur me nivele më të mira të kolesterolit, sheqerit dhe triglicerideve, por nuk ka asnjë hulumtim që lidh përfitimet e tij në zorrë me këta faktorë shëndetësorë”, tha autori i parë Richard Bruno, profesor i të ushqyerit në Universitetin Shtetëror të Ohajos.
Ekipi hulumtues ekzaminoi 40 subjekte në një studim pasues të hulumtimit të vitit 2019 që kishte treguar nivele më të ulëta të mbipeshes dhe rreziqeve shëndetësore, ndërsa përmirësonte shëndetin e zorrëve te minjtë që ushqeheshin me suplemente me çaj jeshil.
Në studimin e ri klinik, ekstrakti i çajit jeshil reduktoi sheqerin në gjak. Pjesëmarrësit – 21 me sindromë metabolike dhe 19 të rritur të shëndetshëm, konsumuan një ekstrakt çaji jeshil të pasur me katekina anti-inflamatore – ekuivalenti ditor i pesë filxhanëve çaj jeshil – çdo ditë për 28 ditë.
“Gjetjet tona na tregojnë se brenda një muaji ne mund të zvogëlojmë glukozën në gjak si tek njerëzit me sindromë metabolike ashtu edhe tek njerëzit e shëndetshëm, dhe ulja e sheqerit duket të jetë e lidhur me një reduktim të inflamacionit të zorrëve”, tha profesori Bruno.
Edhe pse studiuesit nuk aspirojnë të pretendojnë se kanë gjetur kurën për sindromën metabolike me një trajtim një mujor, ata e njohin potencialin e çajit jeshil.
