Disa anëtarë të ekuipazhit të cisternës kimike ruse ”Sig” u plagosën pas një sulmi nga dronët detarë ukrainas në ngushticën Kerç dje në mbrëmje vonë, thanë autoritetet ruse.
Mjeti lundrues është dëmtuar dhe në vendngjarje kanë mbërritur dy rimorkiatorë.
Sipas medieve të Moskës, ajo është cisternë kimike që i nënshtrohet sanksioneve të SHBA-së, pasi ka furnizuar me karburant forcat ruse.
”Trafiku në urën që lidh gadishullin e Krimesë të aneksuar nga Moska me Rusinë u pezullua për tre orë përpara se të rifillonte sot herët në mëngjes”, sipas qendrës së informacionit të autostradës.
Ura e Kerçit është e vetmja urë e këtij lloji që lidh Krimenë me Rusinë dhe përdoret veçanërisht për transportin e materialit për ushtrinë e Moskës në frontin ukrainas.
