Luljeta Preza, 32-vjeçarja nga Sukthi u gjet dje e vrarë dhe hedhur pranë Urës së Dajlanit në Durrës.
Policia tha se e reja ishte qëlluar me thikë, ndërsa ka dyshime se para se të vritej është abuzuar seksualisht.
Disa persona janë marrë në pyetje për krimin makabër. Ku dyshohet se ajo është abuzuar seksualisht dhe më pas është vrarë dhe hedhur mes shkurreve poshtë Urës së Dajlanit ku u zbulua trupi i pajetë.
Lidhur me këtë rast, një reagim vjen nga gazetarja Anila Hoxha, e cila teksa publikon dhe foton e viktimës së djeshme, thotë se për gratë si Luljeta, vrasja e tyre po nga një dorë e tillë, është një krim që ka kohë që ka ndodhur.
“Luljeta Preza, 32 vjeçe. Me një jetë të tmerrshme.
E vetmja pasuri e saj, trupi. Që ja blinin poshtë urës së Dajlanit burrat e orëve të vona.
Kacidhe që i përdorte më pas për drogë dhe ushqim rruge.
Një copë kartoni ish streha e saj shtruar mes dheut dhe gjymtyrëve që muajt e fundit po e linin.
Lëvizte këmba-doras së fundmi, më shumë zvarritej se sa ngulte këmbët.
Thoshte që e kishin përplasur me makinë. Nuk shkoi kurrë në spital. Njëherë vodhi portofolin e njërit prej klientëve, u bë zhurmë e madhe.
Të gjithë e shfrytëzuan, jo vetëm tutori; një maskara në periferi që e rrihte duke kërkuar shumë e më shumë derisa i shoi çdo gjë njerëzore.
Një tjetër, e një tjetër që vetëm ndryshonte emrin e fytyrën nga ai maskarai.
Atje tek Ura e Dajlanit, ajo një grua e destinuar për të jetuar sa në barake, e sa në mes të katër rrugëve.
E destinuar për t’u bërë ose lypëse, ose shitëse trupi.
Gratë si ajo, thuajse nuk ekzistojnë. Kur udhëton drejt jugut apo kalon atje do t’i shikosh tek ecin aq dukshëm të shkatërruara, aq dukshëm duke jetuar në mes të një asgjëje të madhe.
Zero shanse për t’u ringritur.
Për gra si ajo që ju shiten në fakt burrave, vrasja e tyre po nga një dorë e tillë, është një krim që ka kohë që ka ndodhur.
Për gratë si ajo të thonë me çudi “po më pyet për jetën e një prostitute?”.
E qëlluan me dy thika në brinjë, ja lanë aty në baltë vdekjes që mbase ajo e priste.
Për ironi quhen Luljeta. Sa emër të bukur që kishte”, shkruan në rrjetet sociale, gazetarja Anila Hoxha.
