Një oficer policie është ndaluar nga kolegët e tij nën akuzat për korrupsion dhe shpërdorim detyre.
Bëhet fjalë për nënkomisarin Ardit Xhafa, 31 vjeç, në Seksionin e Hetimit të Narkotikëve pranë Drejtorisë Vendore të Policisë Durrës.
“Ndalimi u krye në funksion të procedimit të regjistruar nga kjo Prokurori mbi dyshimet për kryerjen e veprave penale “Korrupsioni pasiv i personave që ushtrojnë funksione publike” dhe “Shpërdorim i detyrës”. Nga hetimet e kryera janë arritur të dokumentohen veprimet korruptive të oficerit Ardit Xhafa, i cili duke keqpërdorur atributet që i jep detyra si oficer në Seksionin e Hetimit të Narkotikëve në DVP Durrës e duke shfrytëzuar pozicionin, ushtronte presion dhe mashtronte shtetasit, që shoqëroheshin me doza narkotike, kundrejt përfitimeve monetare.” – thuhet në njoftimin e Agjencisë së Mbikëqyrjes Policore
Hetimet vazhdojnë deri në dokumentimin e plotë të kësaj veprimtarie të kundraligjshme.
