Ministrja e Industrisë, Ndërmarrësisë dhe Tregtisë në Kosovë, Rozeta Hajdari është përballur ditën e sotme me protestën e gazetarëve kundër vendimit për heqjen e licencës së Klan Kosovës.
Në momentin kur ajo filloi të fliste në konferencen e njoftuar, gazetarët janë afruar një nga një pranë podiumit dhe në mënyrë demonstrative hoqën mikrofonat.
Pas gazetarëve janë tërhequr edhe kameramanët duke u larguar nga salla dhe duke lënë ministren në monologun e saj. Hajdari po fliste për bizneset që kanë bërë shkelje ligjore të ngjashme me Klan Kosovën, shkak për të cilin është marrë vendimi për mbylljen e televizionit.
Vlen të theksohet fakti se një protestë e tillë nuk ka ndodhur asnjëherë në Shqipëri, edhe pse ka patur jo pak raste kur politikanët kanë mbyllur televizione, kanë ofenduar gazetarët, u kanë hequr të drejtën e pyetjeve apo edhe i kanë përzënë nga konferencat, por kolegët nuk i kanë dalë në mbrojtje.
