Struga shkruan historinë në Podgoricë dhe kalon për herë të parë një tur në kompeticionet europiane. Kampionët e Maqedonisë së Veriut jo vetëm që administruan avantazhin 1-0 prej takimit të parë, por fituan edhe në Mal të Zi ndaj kundërshtarëve të Buducnost, me rezultatin 3-4.
Një festival golash në “Stadion Pod Goricom”, por në fund ishin të besuarit e Shpëtim Duros ata që avancuan më tej me rezultatin e përgjithshëm 5-3.
Heroi i mbrëmjes së sotme për struganët ishte Marjan Radeski me një tregolësh në minutat 11′, 45+2′ dhe 73′, ndërsa golin tjetër e shënoi partneri i tij në sulm, Besart Ibraimi në minutën e ’65. Për vendasit realizuan Djurickovic 7′, Adzic 45+7′ dhe Sekulovic 82’.
Nga minuta e parë u aktivizuan dhe dy lojtarët që kanë luajtur për disa sezone në kampionatin shqiptar; Vangjel Zguro dhe Mentor Mazrekaj, me këtë të fundit që dhuroi dhe asistin tek goli i parë i Strugës.
Kështu, Struga i bashkohet Partizanit nga ekipet shqiptare në turin e tretë të Conference League, teksa përballë do të ketë skuadrën nga Luksemburgu të Hesperange.
