Ka nisur që prej orës 08:00 votimi për farsën zgjedhore në Partinë Demokratike të vulës për të rikthyer Lulzim Bashën sërish kryetar.
Kandidat përballë këtij të fundit është Gjergj Hani, por ky i fundit e ka deklaruar edhe vetë publikisht se nuk ka asnjë mundësi për t’u zgjedhur kryetar. Grupi i Lulzim Bashës duket i vendosur për ta rizgjedhur sërish Lulzim Bashën kryetar, madje duke përjashtur dhe shpallur armik këdo në PD që ishte kundër këtij procesi.
Këshilli Kombëtar i PD-së u mblodh online më 27 Korrik dhe e anuloi këtë farsë zgjedhore dhe grupi parlamentar bëri thirrje ditën e djeshme për t’u anuluar, por grupi i Lulzim Bashës duket se janë të bindur për ta çuar deri në fund misionin e tyre.
Në këto votime, PD e Bashës zvogëloi dhe numrin e anëtarësisë së PD-së në më pak se 1/3 krahasuar me zgjedhjet e fundit të vitit 2021 në PD, nga rreth 75 mijë anëtarë demokratë, në 25 mijë.
Kandidati Gjergj Hani voton në orën 10.00 tek zyrat qendrore të PD, ndërsa Lulzim Basha në 11.00 pranë zyrave të degës 8 në Tiranë. Mbetet për t’u parë se si do të shkojë përplasja në grupin e PD-së së vulës, pasi grupi i Gazment Bardhit e quan si akt përçarës dhe antistatutot, teksa ka paralajmëruar se do e çojë në gjykatë.
