Nën dyshimet për vota fiktive dhe me kuti votimi thuajse bosh, Lulzim Basha arriti të rizgjidhet në krye të PD-së vulës, me 16 196 vota.
Pas shpalljes së rezultateve përfundimtare nga Komisioni Zgjedhor, Basha ka zhvilluar një komunikim për mediat. Edhe pse vetë mbëshetësit e tij e kanë nxjerrë sheshit ‘farsën zgjedhore‘, Basha shprehet se procesi ishte shembullor, teksa shton se: ‘ka ardhur koha t’i përvishemi një tjetër beteje.’
“Ju falënderoj për mbështetjen dhe pjesëmarrjen tuaj. Mirënjohje për votuesit dhe falënderim i veçantë për Gjergji Hanin që me fuqinë e argumentit të tij, pastërtinë dhe përkushtimin ndaj PD e ktheu këtë proces në një debat të vërtetë idesh dhe vlerash si i takon garës. Jam i vetëdijshme për sfidat me të cilat ndodhet PD. Lumenjtë e mosbesimit rrjedhin akoma, ca të vërteta dhe ca të sponsorizuar nga ata që e duan Shqipërinë, pa liri, pa barazi para ligjit.
Mbi të gjitha e sotmja nuk shënon votën për një individ, por shënon nisjen e punës dhe puna fillon për të ndërtuar mes dy brigjeve të lumenjtë të mosbesimit, urën mes bregut të sotëm të dëshpërimit të shqiptarëve, depresionit psikologjik, ekonomik, mllefit e dëshirës për ndryshim dhe bregut e shpresës dhe besimit që do të sjellë ndryshimin e qeverisjes pavarësisht bindjeve politike. Nuk ka për të qenë e lehtë, por demokratët treguan se jemi gati t’i përvishemi një tjetër beteje. Shqipëria pret që demokratët të kthehen në krye të detyrës për të mbrojtur interesin publik”, tha Basha.
