Janë zbardhur detaje të reja nga aksioni “Metamorfoza”, ku SPAK lëshoi 15 urdhër-arreste për personazhe të njohur të krimit, biznesit, drejtësisë dhe policisë, pas përgjimeve të ardhura nga autoritetete franceze, pas çkodimit të mesazheve në aplikacionet “Sky” dhe “Encro, që çoi në zbulimin e 4 ngjarjeve kriminale.
Burime bëjnë me dije se ish-efektivi i policisë, Edmond Preka që prej disa kohësh shërbente si shofer i biznesmenit Pëllumb Gjoka, ka patur rol aktiv në vrasjen e Gjin Ndojit (Boriçit), si dhe ka qenë i përfshirë edhe në planin për ekzekutimin e Kleant Musabelliu, ish-punonjës i drejtorisë së Burgjeve.
Në dosjen hetimore të SPAK, evidentohen prova që krijojnë dyshime të arsyeshme se Edmond Preka, në vrasjen e Gjon Ndoj (Boriçi), më 9 Gusht të vitit 2020 në Vaun e Dejës, ka ndihmuar autorët e krimit për tu larguar nga vendi i ngjarjes, pasi i morën jetën shenjestrës me dy plumba në kokë dhe një në shpatull.
Vrasja e Boriçit dyshohet të jetë kryer nga Behar Bajri dhe klani i tij. Në bazë të transkripteve, Behar Bajri nga përgjimet rezulton se flet me Gjokën dhe i thotë se kishte gjetur 3 shtetas të huaj, një arab, një nga Kosova dhe një serb. Ata kërkonin 100 mijë euro, teksa Gjoka i thotë që ‘nëse është nevoja jepu më shumë’. Por Bajri del garant duke i thënë që ‘për kaq para do ta bënin vetë’.
Ndërsa, në atentatin e pa realizuar ndaj Kleant Musabelliut, mësohet se Edmond Preka ka informuar grupin e Ervis Martinajt me foto dhe informacione mbi lëvizjet e shënjestrës, ndërsa ka krijuar kushte për vrasjen e tij. Atentati dështoi në rrethana të pa qartësuara deri më sot nga autoritetet. Ish-efektivi i policisë ka luajtur rolin e informatorit ndaj personave të interesuar për asgjësimin e Musabelliut.
Nga urdhër-arrestet e lëshuara nga SPAK, vetëm 6 pesona u arrestuan dhe 9 të tjerë janë shpallur në kërkim. Personat e arrestuar janë shtetasit: Pëllumb Gjoka, Edmond Preka, Ardit Hasanbega, Astmer Bilali, Oltion Bistri dhe Xhevahir Lita. Ndërsa, në kërkim janë shpallur shtetasit: Behar Bajri Brahoviç, Ervis Martinaj, Denis Bajri Brahoviç, Klaudio Haka, Prekë Kodra, Aleks Ndreka, Arsat Bashli, Bardhyl Mavraj, Elion Hato.
Uniformat blu bënë me dije se pas kontrollit të ushtruar në 26 banesa dhe ambjente, sekuestruan në total: 8 armë zjarri (6 pistoleta, 1 automatik, 1pushkë), municion luftarak, 19 karikatorë për mbajtje municionesh, 2 baza për vendosje snajperi , 3 armë gjahu, , 2 baza karikues radiosh policie, 2 armë të ftohta, 3 maska, 1 paruke, 8 automjete (4 prej tyre të blinduara), 1 kamera kurth, 2 targa automjetesh, 3 ora dore të markave të shtrenjta, 3 409 000 lekë, 31 205 euro, 4 400 dollarë, 3 USB, 7 DVR, 28 celularë dhe 1 laptop.
Të arrestuarit dhe të shapllurit në kërkim akuzohen për ngjarjet kriminale të ndodhur gjatë vitit 2020 dhe 2021 në Shkodër, më konkretisht për:
-Vrasjen Gjin Boriçi Ndoji, në Shkodër në gusht 2020.
-Vrasjen e mbetur në tentativë të Taulant Pepaj, në Shkodër në shkurt 2021
-Sigurimin e kushteve për vrasjen e Kleant Musabelliut në Tiranë shtator 2020.
-Sigurimin e kushteve për vrasjen e Dorjan Dhuli, Ibrahim Licit dhe Genc Tafilit, në 2020.
