Ushtria në Nigeri ka bërë grusht shteti, që nisi nga garda presidenciale. Në një deklaratë, ushtria thotë se prioritet është shmangia e destabilizimit të vendit.
“Kemi vendosur t’i japim fund këtij regjimi për shkak të përkeqësimit të situatës së sigurisë dhe qeverisjes së keqe. Kufijtë e vendit janë mbyllur dhe është shpallur shtetrrethimi mbarëkombëtar.”- shprehen ata.
Kreu i shtetit, Mohamed Bazoum ra nga pushteti pasi trupat e armatosura bllokuan më herët pallatin presidencial në Niamey. Ai vijon të mbahet i izoluar nga garda.
Kolonel Amadou Abdramane tha se aktivitetet e të gjitha institucioneve të vendit janë pezulluar.
OKB-ja dhe SHBA-ja kanë dënuar grushtin e shtetit. Nga ana e saj, Shtëpia e Bardhë shprehu “shqetësimin e thellë” për situatën dhe kërkoi lirimin e menjëhershëm të presidentit Bazum.
Bazum u zgjodh president i vendit në vitin 2021 në atë që ishte tranzicioni i parë demokratik i pushtetit në një shtet që nga pavarësia nga Franca ka parë 4 grushte shtetesh.
