Pas më shumë se 6 orësh, 40-vjeçarja Alma Kaçi ka lënë ambientet e Prokurorisë së Posaçme, ku ka dëshmuar sërish për llogari të hetimit që nisi pas publikimit të videoskandalit seksual në zyrën e ish-kryebashkiakit të Kukësit Safet Gjici.
Burime bëjnë me dije se ajo është marrë në pyetje nga agjentët e Byrosë Kombëtare të Hetimit dhe prokurorja Manjola Kajana. Mësohet se qëllimi i hetuesve ka qenë zbulimi i personave të tjerë që mund të fshihen pas kësaj video si dhe qëllimet e regjistrimit të saj.
Përgjatë qëndrimit të saj që prej orës 10:00 të mëngjesit, Alma Kaçi është përgjigjur pytjeve mbi regjistrimin e videos, mënyrën se si është kryer dhe nëse ka pasur persona të tjerë të cilët kanë qenë në shënjestrën e saj. Po ashtu, ajo ka sqaruar dhe rolin e saj me ish-kryebashkiakun Safet Gjici, takimet që ka kryer dhe diskutimet për një projekt mbi qytetin e Kukësit në lidhje me sterilizimin e qenëve.
Ditën e djeshme është marrë në pyetje edhe ish-kryebashkiaku i Kukësit, Safet Gjici, i cili vazhdon të qëndrojë në qeli, ndërsa për Alma Kaçin, gjykata ka caktuar masën e sigurisë “arrest shtëpie”.
Të dy kanë pretenduar se kishin një lidhje intime me njëri-tjetrin përpara se të flisnin në zyrën e kryetarit për tender e favorizime pasi kishin kryer marrëdhënie intime.
