Policia ka gjobitur ditën e sotme një shtetas, i cili ka shkelur perimetrin e sigurisë, në Ksamil.
Blutë bëjnë me dije se është gjobitur me 2 milionë lekë shtetasi me iniciale, S. Sh, i cili lëvizte me mjetin e tij lundrues brenda perimetrit të sigurisë duke vënë kështu në rrezik jetën e pushuesve.
“Shërbimet e Policisë Kufitare Sarandë, në bashkëpunim me Njësinë Policore Detare, kanë ndërhyrë menjëherë në plazhin e Ksamilit, duke bërë bllokimin e një mjeti lundrues që kishte dalë në breg të detit duke shkelur perimetrin e sigurisë ujore për plazhistët dhe duke vënë në rrezik jetën e tyre.
Shërbimet e Policisë Kufitare e kanë ndëshkuar drejtuesin e mjetit lundrues, shtetasin S. Sh., me masën administrative 200 000 lekë të rinj.
Mjeti lundrues i bllokuar është shfaqur edhe në video të postuara në rrjetet sociale”,- njofton Policia.
