Skënderbeu po punon intensivisht për të qenë gati në fillim të sezonit, që starton mesin e muajit të ardhshëm.
Korçarët, veç dy seancave stërvitore në ditë, janë të fokusuar edhe në testet që i shërbejnë ekipit për të parë gjendjen e lojtarëve dhe mbi të gjitha për të ndërtuar një profil të qartë loje.
Nisur nga puna në këto kohë përgatitjesh, sulmuesi bardhekuq, Gresild Lika, duket i kënaqur për nga fakti se si ekipi është duke e përballuar ngarkesën dhe se si po përgjigjet në fushë.
Në një prononcim së fundmi, Lika shprehet i gatshëm për të dhënë maksimumin për ekipin edhe në kushtet kur konkurrenca vjen gjithnjë e në rritje.
Ndërsa nga ana tjetër tregon se si e sheh ekipin në kuadër të sezonit të ri.
“Është java e tretë e përgatitjeve intensive dhe duhet të them se ky ekip po rritet dita–ditës. Fakti që në testet miqësore kemi treguar grintë dhe dëshirë, na bën të ndihemi mirë, por përveç kësaj nuk kemi pasur probleme fizike dhe kjo është më e rëndësishmja. Boshti i ekipit nga vjet është, ndërsa klubi ka punuar për të sjellë elementë cilësorë në merkato, që e kanë shtuar potencialin e skuadrës.
Ndaj edhe për këtë duhet që të japim maksimumin në çdo seancë për të mbajtur fanellën e titullarit, pasi këtë sezon konkurrenca edhe brenda grupit pritet të jetë më e madhe. Unë jam i bindur se dhe lojtarët që do t’i bashkohen ekipit do të na japin një ndihmesë, pasi sezoni është i gjatë dhe kemi nevojë për shumë alternativa cilësore. Skënderbeu është mbi të gjitha, ndaj edhe trajneri këtë frymë po fut në grup që në ditën e parë të punës me të”, theksoi Gresild Lika.
