Lufta në Ukrainë rrezikon që të shndërrohet në një përplasje shumë të pisët. Presidenti rus, Vladimir Putin, kërcënoi me përdorimin e bombave thërrmuese, tepër të rrezikshme për civilët, nëse ushtria e Kievit do ta bënte e para diçka të tillë.
“Dëshiroj të theksoj se Federata e Rusisë ka mjaftueshëm të magazinuara lloje të ndryshme të municioneve thërrmuese. Një shumëllojshmëri të madhe. Ne nuk i përdorëm ato pasi nuk e patëm të nevojshme, qoftë edhe kur kishim një mungesë municionesh për një periudhë kohore. Por, sigurisht, nëse ato përdoren kundër nesh, ne kemi të drejtë që të bëjmë një veprim reciprok”, tha Putin.
Në fushën e betejës, luftimet kanë vazhduar me një intensitet tepër të lartë. Rusia ka bombarduar qytetin e Zaporizhias, ku raportohen civilë të plagosur. Shpërthime janë dëgjuar në Kharkiv, por edhe në qytete të tjera. Washington Post raporton se kundërofensiva ukrainase po avancon tepër ngadalë pasi territoret e pushtuara nga rusë janë minuar në një nivel të dendur.
Gjeneralët e Kievit fajësojnë për këtë pritjen e madhe që u bë përpara nisjes së kundërsulmit të ushtrisë. New York Times raporton se Ukraina ka humbur 20 për qind të armëve të saj në dy javët e para të kundërofensivës. Ndërsa presidenti Volodymyr Zelensky konfirmoi se shpejtësia e përfundimit të kësaj lufte varet drejtpërdrejtë nga mbështetja globale për vendin e tij. Ndërkohë, Moska akuzon Ukrainën se po sulmon territorin rus. Pretendohet se janë rrëzuar 9 dronë ukrainas në Krimenë e aneksuar.
