Ish-kryebashkiaku socialist i Fushë-Arrëzit Fran Tuci është arrestuar nga policia, në zbatim të një urdhri të Gjykatës së Posaçme, të kërkuar nga SPAK.
Bashkë me Tucin, në pranga është vënë edhe ish-Administratori i Njësisë Administrative Iballë Ndoc Marku, ndërsa në kërkim është shpallur administrator i një firme private.
Ndaj Fran Tucit, GJKKO ka caktuar në mungesë masën e sigurisë së arrestit me burg për akuzën e shpërdorimit të detyrës, kryer në bashkëpunim. E njëjta akuzë rëndon ndaj ish-administratorit të Iballës, ndaj të cilit është dhënë nga gjykata masa e “arrestit në shtëpi”.
Masat janë ekzekutuar më 12 dhe 13 korrik nga policia.
Një tjetër person, administrator i një firme private është shpallur në kërkim policor. Ndaj tij, GJKKO ka dhënë “detyrim paraqitje” për veprën penale “Shkatërrimi i pronës”.
Hetimet
Hetimet nga SPAK kanë nisur në fillim të vitit pas tranferimit të dosjes nga prokuroria e Pukës, lidhur me hapjen e një segmenti rrugor në territorin administrativ të Bashkisë Fushë Arrëz.
SPAK thotë se rreth 1.8 km rrugë me gjerësi rreth 5 m është hapur duke dëmtuar pyjet përmes një nisme “të pamiratuar më parë nga autoritetet kompetente”. Punimet janë realizuar nga firma me administrator personin e shpallur në kërkim. Punime të kryera me mjete të rënda, që sipas akuzës, kanë shkaktuar dëmtimin e terrenit si edhe shpyllëzimin në zonë, të përllogaritur nga IKMT Shkodër në një dëm prej rreth 2.34 miliardë lekë.
“Pas kryerjes së veprimeve hetimore në kuadër të këtij procedimi penal, ka rezultuar se në territorin nën juridiksionin administrativ të Bashkisë Fushë Arrëz, në kundërshtim me të gjithë kuadrin ligjor në fuqi, është hapur një segment i ri rrugor rreth 1.8 km dhe gjerësi rreth 5 m, i cili ka cënuar një sipërfaqe të konsiderueshme të fondit pyjor në pronësi të kësaj Bashkie si edhe ka dëmtuar rëndë terrenin që i përket këtij fondi pyjor. Dëmi i përllogaritur nga IKMT Shkodër, pas inspektimit të kryer në terren, kap vlerën e konsiderueshme të 234,007,500 lekë, i cili përfshin dëmtimin e terrenit si edhe shpyllëzimin e sipërfaqes se regjistruar pranë ASHK, Drejtoria Vendore Pukë, si pasuri të llojit “Pyll” në pronësi të Bashkisë Fushë Arrëz”, njofton SPAK.
Të njëjtat burime bënë me dije se nga veprimet hetimore ka rezultuar e provuar se ish titullari i Bashkisë Fushë Arrëz Fran Tuci, në bashkëpunim më ish Administratorin e Njësisë Administrative Iballë Ndoc Marku, “me veprime dhe mosveprime në kundërshtim me ligjin, të cilat përbëjnë mospërmbushje të rregullt të detyrës, duke sjellë në të njëjtën kohë edhe pasojë të rëndë materiale për shtetin, kanë lejuar hapjen e një segmenti të ri rrugor auto rural, të pamiratuar më parë nga autoritetet kompetente”.
“Punimet për hapjen e këtij segmenti të ri rrugor është provuar të jenë kryer nga shtetasi D.M., administrator i një subjekti tregtar privat. Ky shtetas, duke vepruar në terren me mjete të rënda, pa patur asnjë leje nga organet kompetente, ka shkaktuar shkatërrimin e pronës, duke kryer gërmime në volume të konsiderueshme dhe njëkohësisht duke shpyllëzuar fondin pyjor në pronësi të Bashkisë Fushë Arrëz”, mbyllet njoftimi i SPAK.
Emri i ish-kryebashkiakut socialist u përfol në media në Qershor të vitit 2020, kjo pasi vëllai i tij Albert Tuci u vu në pranga gjatë një operacioni anti-drogë. Asokohe Tuci ishte në detyrën e kreut të bashkisë Fushë-Arrëz dhe PD kërkoi që ai të jepte dorëheqjen. Ndërsa kryedemokrati Sali Berisha e ka theksuar shpesh se ish-kryebashkiaku ka disa dosje për korrupsion në prokurori. Fran Tuci ka qenë kryetar i bashkisë së Fushë-Arrëzit nga viti 2015 deri në zgjedhjet e majit 2023 kur humbi në garën për mandatin e tretë përballë kandidatit të opozitës Hilë Curri.
