Bashkimi Evropian e ka quajtur zhgënjyese dhunën e sotme në Kuvendin e Kosovës.
Zyra e BE në Kosovë ka reaguar për tensionet e sotme në Kuvendin kosovar, duke i quajtur zhgënjyese skenat e dhunës.
”Skena zhgënjyese dhune shihen sot në Kuvend. Kuvendi nuk është vend për sulme fizike, por vend për të diskutuar propozimet dhe politikat në mënyrë demokratike. Diskursi dhe shkëmbimi i ideve janë bazat themelore të një demokracie”, thuhej në reagimin e zyrës së BE.
Tensione të forta ka patur këtë të enjte në Parlamentin e Kosovës, ku teksa kryeministri Albin Kurti po mbante fjalën, deputetët e Partisë Demokratike kanë goditur me grusht kreun e qeverisë dhe ministrin Hekuran Murati.
Më pas, pas një shkëputje prej 2 orësh seanca filloi sërish, por deputetët e PDK kanë bllokuar foltoren duke krijuar tensione të cilat kanë përfunduar në dhunë fizike. Deputetja e AAK ka goditur me shishe uji kryetarin e Kuvendit, Glauk Konfjuca. Truprojat kanë ndërhyrë për të ulur tensionet mes palëve.
