Në 16:00 është planifikuar të nisë seanca në Këshillin e Mandateve ku do të shqyrtohet kërkesa e SPAK, që i kërkon Kuvendit leje për arrestimin e deputetit të PS-së Arben Ahmetaj.
Në ambientet e kryesisë, kanë mbërritur dy prokurorët e SPAK që i kanë paraqitur kërkesën Kuvendit, drejtuesi i institucionit Altin Dumani dhe Enkeleda Millonai.
Vetë ish-ministri i Financave nuk është paraqitur, ndërsa në ambientet e kryesisë u panë të hyjnë dy avokatët e tij, që sikundër është raportuar më herët gjatë ditës, pritet të kërkojnë shtyrjen e seancës.
Një ditë më parë, kryeparlamentarja Lindita Nikolla vendosi që mbledhja të zhvillohet me dyer të mbyllura, duke pranuar kërkesën e SPAK, që argumentonte këtë procedurë për shkak të “sekretit hetimor”.
Arben Ahmetaj akuzohet për korrupsionit pasiv, pastrim parash dhe fshehje pasurie.
