Në ditët në vijim pritet që FSHF të finalizojë dokumentin përfundimtar për ndryshimet që do të bëhen në formatin e Superiores, nisur dhe nga sugjerimet e bëra nga klubet, që parimisht ishin dakord për të bërë ndryshime dhe më pas materiali do t’i dërgohet Komitetit Ekzekutiv të FSHF-së për miratim.
FSHF-ja u shtroi në tavolinë pak ditë më parë disa opsione, ku secili kishte edhe një mori variantesh, por mësohet se klubet kanë rënë dakord që kampionatit t’i shtohet një miniturne ose “play off”, i quajtur “Final 4”.
Pas përfundimit të kampionatit me 36 javë, 4 skuadrat e para në renditje do të zhvillojnë një miniturne mes tyre, ku do të përballen dy herë me njëra-tjetrën, me të gjitha ndeshjet që do të luhen në stadiumin “Air Albania”.
Çdo ekip do të luajë 6 ndeshje, 3 në raundin e parë dhe 3 në të dytin me pikët e grumbulluara që do t’i shtohen atyre pas 36 javëve kampionat.
Më pas renditja përfundimtare do të caktojë skuadrën që do të fitojë titullin kampion dhe skuadrat që do të shkojnë në Europë, duke nisur nga vendi i parë që luan në Champions League dhe të tjerat në Ligën e Konferencës.
Sa i përket pjesës së kampionatit të rregullt, skuadra që përfundon e para, do të marrë bonusin financiar të akorduar nga FSHF-ja prej 100 milionë lekësh, vlerë kjo e pandryshuar që prej vitit 2002. Kjo shumë i shkon ekipit të vendit të parë, pavarësisht si shkon në “Final 4”.
Gjithashtu nëse pas ndeshjeve të miniturneut, ajo del me pikë të barabarta me një ekip tjetër, do të klasifikohet më sipër. Këto janë benefitet që merr skuadra që del e para në kampionat, pasi titulli kampion do të vendoset në “Final 4”.
