Skënderbeu i këtij sezoni pritet të jetë plot surpriza dhe befasues sa i përket kampionatit.
Kjo është përshtypja e krijuar nga Dean Liço, që do të luajë sezonin e dytë me ekipin e Korçës.
Për fantazistin korçar mënyra e organizimit të klubit dhe merkatoja e deritanishme ka lënë shije të mire në grup, madje ka krijuar besim dhe shpresë te të gjithë lojtarët.
Në një prononcim për “Panorama Sport”, Liço flet me superlativa për grupin dhe pritshmëritë.
“Skënderbeu po plotësohet nga dita në ditë dhe normalisht që diçka e tillë është një plus për ne. Unë isha i vetëdijshëm për këtë vijimësi të klubit që në momentin kur pranova të bëhem pjesë e këtij projekti. Është diçka e prekshme që ne po e shohim çdo ditë në stërvitje, se si po lind ekipi i ri i Skënderbeut për këtë sezon. Fakti që klubi po punon me bindje për të afruar lojtarë, të cilët kanë shumë cilësi dhe duan të promovohen, më jep besim. Kjo për vetë faktin se do të kemi një Skënderbe të etur në sezonin e ri. Një ekip që do të kërkojë të lërë shenjën e tij në këtë kampionat”, theksoi fillimisht Liço.
I ndalur më pas tek aspekti personal, mesfushori kërkon të përsërisë një sezon në nivele të larta për të tentuar sërish daljen në tregun europian. Për këtë është i bindur që të japë me të mirën për ta arritur qëllimin.
“Unë pranova që të jem pjesë e këtij grupi që në fillim, me besimin se kjo aventurë do të më ndihmojë edhe në aspektin personal. Jam i bindur se ky do të jetë viti i kthesës për mua, që do të më rikthejë në tregun europian, pasi ky është objektivi im primar. Jam i sigurt që kam bërë zgjedhjen e duhur, pasi Skënderbeu është një markë, por do të marr edhe minutat e duhura në këmbë për të treguar veten”, përfundoi Liço.
