Banorët e Borizanës kërkojnë mbylljen e gurores së Përparim Rrajës, i afërmi i ligjvënësit të PS-së Rahman Rraja, i cili njoftoi dorëheqjen si deputetet këtë të shtunë. Akti erdhi pas pamjeve të publikuara në media ku shquhej se si familjarë dhe të afërm të tij dhunuan barbarisht dy kushërinjtë Maja. Këta të fundit kishin denoncuar në polici dëmet që shkaktonte puna e gurores në banesat e tyre.
Edhe banorët e Borizanës, ku ndodhet biznesi në fjalë, përsëritën këtë të shtunë për mediat se banesat e tyre janë dëmtuar nga veprimtaria shpërthyese që përdorej nga gurorja. Disa prej tyre, të cilët treguan se punonin prej kohësh edhe vetë në këtë lloj biznesi, thanë se shpërthimet që janë përdorur aty, janë të formave jo ligjore ndaj edhe banesat e tyre kanë pësuar dëmtime.
Një prej banorëve tregoi se për këtë problematike, në polici janë bërë 40 kallëzime prej tyre, por siç shprehen, të gjitha kanë rënë në vesh të shurdhër për shkak të ndikimit që Rrajat kanë mbi këtë institucion.
Një tjetër paralajmëroi se çështja mund të agravojë në hasmëri mes dy fiseve, dhunuesve Rraja dhe të dëmtuarave Maja.
Për dëmet në banesa nga veprimtaria e gurores duket se ka qenë në dijeni edhe qeverisja lokale. Sipas dëshmisë së një qytetari, kryebashkiaku i Krujës Artur Bushi u ka premtuar dëmshpërblim për dëmet para zgjedhjeve para zgjedhjeve. Por, ai shton se tani që zgjedhjet mbaruan dhe PS fitoi, nuk u hap as telefonin.
“Duhet t’i bëj thirrje shtetit, shikoni gjërat me detaje, mos jepni leje për para, jepni leje me kritere. Hajde shikoni gjendjen si është gurorja. Mua më është mërzitur jeta këto 6 muaj dhe dua t’i bëj një pyetje Rrahman Rrajës, i cili është nga Nikla, pse o mik, pse o njeri i ligjit, o deputet i zonës na, për 2 litra naftë që të iki kamioni pak më lartë që të hapi guroren, po na i prish shtëpitë. Distanca është shumë e afërt, mund të jetë afërsisht 150 m nga banesat. Janë 150 shtëpi këtu në fshat, ka 6-7 muaj që po punon gurorja. Janë çarë shtëpitë komplet, unë kam familjar invalid, edhe karrocën ma kanë fal se s’kam lekë. Kanë ardhur njerëzit kanë bërë inspektimet, por nuk kemi asnjë dëmshpërblim, prit gomar të mbijë barë. Kanë ardhur para votimeve dhe kryetari i bashkisë na tha se do t’i rregullojmë, pas zgjedhjeve nuk na hap as telefonin”, tha banori.
“Nuk ka shtet, të bëjë pritë këtu nuk kam punë me të. Nuk po i themi gjë për ndotjet, shteti të vërë dorë. Rama mos të shkojë jashtë shtetit të bëjë samite, por të vijë këtu. Hajde se do hyjnë në hasmëri dynjaja, janë dy fiset më të forta në rrethin e Krujës, ke për t’ia dëgjuar tymin tutje, kë për të parë sa vite ka për të shkuar hasmëria”, ishte një tjetër dëshmi.
“Kemi bërë 40 denoncime me emër dhe mbiemër, që janë në sirtarët e Policisë dhe të cilat kanë sjellë rrahjen e çunave. Në dukagjin të Shkodrës ka 100 vite që ka gjakmarrje, tani shteti po e sjell edhe në Fushë-Krujë. Thonë ka kriminelë, por kriminelë janë policia e Fushë-Krujës dhe më pas vijnë ata të Tiranës, që nuk i komandojnë këta të Fushë-Krujës. Tani të vi Edi Rama bashkë me Beliund Ballukun këtu, që të pajtojë gjaqet që janë rrahur dy çunat. A mund t’i pajtojnë ata? Mua personalisht nëse më rrahin, më mirë pranoj vdekjen, pasi do më thotë nusja, se nuk ke surrat që të dalësh. Çfarë të bëjmë tani? A ka shtet këtu? Apo të vrasin vetë”, tha një banor tjetër.
