Ministri i Brendshëm Bledi Çuçi ka reaguar disa orë pas publikimit të pamjeve të dhunës nga anëtarë të fisit Rraja ndaj dy kushërinjve Muja.
Në një postim në rrjetet sociale, ai thotë se pamjet e pamjet e dhunës janë të rënda dhe të papranueshme.
“Askush nuk është mbi ligjin dhe s’mund t’u shpëtojë përgjegjësive në asnjë rrethanë”, shton.
Sipas tij, Policia e Shtetit ka ushtruar kontroll të imtësishëm në banesat e të dyshuarve, ka arrestuar 4 persona sot herët në mëngjes dhe po punon për kapjen sa më parë të 3 të tjerëve të përfshirë në ngjarje.
“Çdo insinuatë tjetër s’ka lidhje me të vërtetën dhe me punën e Policisë së Shtetit për të çuar autorët përpara drejtësisë”, e mbyll reagimin ministri.
Pamjet e videos së dhunës treguan se familjarë dhe të afërm të deputetit të PS-së Rrahman Rraja sulmuan mizorisht dy kushërinjtë Muja, pasi këta të fundit kishin bërë një denoncim në polici se veprimtaria e gurores në pronësinë e një prej anëtarëve të fisit Rraja u kishte sjellë dëme në banesë.
Djali i deputetit të PS shihej në video teksa godiste një prej kushërinjve Muja me shkop bejsbolli, ndërsa një prej vëllezërve godiste me grushte e shqelma teksa në dorë mbante një pistoletë.
