Gjykata e Tiranës dënon me burgim të përjetshëm Mexhit Picarin. Ndërkohë, e bija e Picarit, Dhurata Picari, e akuzuar si bashkëpunëtore në krim u dënua me 30 vite burg. Babë e bijë akuzohen se kanë bashkëpunuar për vrasjen e Kudret Saliajt, më 4 qershor të 2021, në Tiranë.
Paraditen e 4 qershorit, Mexhit Picari dhe vajza e tij, Dhurata Saliaj, janë nisur së bashku nga Vora për në Gjykatën e Tiranës, por qëllimi i tyre nuk ka qenë seanca e pestë e divorcit të kësaj të fundit.
Sipas prokurorisë, në orën para seancës, ata kanë vëzhguar për të parë Kudret Saliajn në ambientet e gjykatës dhe rrotull saj.
Pas seancës në Gjykatën e Tiranës, Saliaj dhe avokati i tij ishin ulur në një kafe dhe vetëm disa metra më tutje ndodhej edhe ish-bashkëshortja e tij.
Sapo i ka parë të ulur, Picari i cili ka qenë më herët ish-efektiv burgjesh, qëlloi 5 herë në drejtim të ish- dhëndrit 41-vjeçar duke e lënë të pajetë.
Plumbat kapën dhe avokatin, ish-prokurorin Cama, por që fatmirësisht është jashtë rrezikut për jetën.
Në dëshminë e saj në gjykatë, Dhurata Saliaj deklaroi se nuk e dinte që i ati do të kryente një vrasje.
“Nuk do ta lejoja kurrë. Kudreti ishte babai i fëmijëve të mi dhe nuk do ta lejoja. Kërkoj mëshirë nga Gjykata, kam tre fëmijë për të rritur”.
Ndërsa Mexhit Picari kërkoi ndjesë për vrasjen.
“Të më falin nipërit dhe mbesat. I kërkoj falje edhe vajzës që i vrava burrin. Dhurata s’ka pasur dijeni. Pistoletën e kisha në brez dhe nuk e mora në çantën e gocës”, tha ai.
