Turin ballkanik që përkon me përgatitjet për takimin e nivelit të lartë në kuadër të Procesit të Berlinit, që do të zhvillohet tetorin e ardhshëm në Tiranë, kryeministri Edi Rama e nisi nga Shkupi, ku takoi homologun maqedonas Dimitar Kovaçeski.
Fokusi në intervistën pas takimit dypalësh ishte te refuzimi i Albin Kurtit për ta pritur në zyrën e tij në Prishtinë, me Ramën që iu drejtua më pas kryeqytetit të Kosovës duke i përmendur kryeministrit të Kosovës rregullat e kanunit.
Rama mbërriti në Prishtinë në orën 16:20 dhe në aeroportin “Adem Jashari”, delegacioni shqiptar u prit vetëm nga ambasadori i Shqipërisë në Kosovë, Qemal Minxhozi.
Më pas shefi i qeverisë shqiptare i është drejtuar Presidencës, ku është pritur nga Vjosa Osmani në një takim dy palësh.
Pas presidentes së Kosovës, Rama pritet të takojë kryeparlamentarin Glauk Konjufca, ndërsa një takim me Kurtin është ende i shoqëruar me pikëpyetje.
Kurti ka dalë nga zyra e tij rreth së njëjtës orë kur Rama zhvillonte takimin me Osmanin.
Interesimit të mediave lidhur me një takim të mundshëm me Ramën, kreu i qeverisë së Kosovës ka refuzuar ti përgjigjet. Ai ka përshëndetur gazetarët dhe ka hyrë në automjetin e tij për tu larguar.
Ditën e djeshme, Kurti refuzoi një takim me Ramën.
