Avokati i ish-ministrit Lefter Koka, ka deklaruar sot se klienti i tij është i pafajshëm në lidhje me akuzat të cilat rëndojnë mbi të: “shpërdorim detyre”, “korrupsion pasiv” dhe “pastrim i produkteve të veprës penale”. Avokati Julian Mërtiri ka theksuar se nuk ka asnjë provë që implikon klientin e tij, në përfitime te paligjshme për favorizim në dhënien e koncesionit.
Mërtiri deklaroi se Koka ka zbatuar vendimin e Këshillit të Ministrave. Dhe se ka qenë komisioni që është ngritur me përfaqësues të shumë ministrive dhe pushtetit lokal, që ka vendosur për dhënien e koncesionit, ndërsa Koka ka firmosur thjesht vendimin e qeverisë.
Në mbrojtjen që i bëri e cila ka zgjatur për rreth 5 orë, avokati kërkoi lirimin e Kokës për shkak të moshës, për arsye se ka probleme të shëndetit, është baba i 3 fëmijëve dhe mbahet prej shumë kohësh në paraburgim. Po kështu, kërkoi heqjen e sekuestros, sepse nuk ka “shpërdorim detyre”, e për rrjedhojë nuk ka pastrim të produkteve të veprës penale.
Avokati tjetër i Lefter Kokës ka ngritur akuza të forta, teksa u shpreh se klienti i tij nuk ka pasur lidhje me Klodian Zoton. I vetmi që sipas tij ka pasur lidhje me këtë të fundit, ka qenë ish ministri Arben Ahmetaj. Ai madje shtoi se Ahmetaj ka transaksione në një vilë, si edhe disa emaile, ku duket qartë kush është personi që ka komunikuar dhe ka bashkëpunuar me administratorin e inceneratorit të Elbasanit.
