Prokuroria e Tiranës po heton ngjarjen e rëndë të ndodhur në mesnatën e së hënës ku mbeti i vrarë 29-vjeçari Ramazan Sino, kunati i Gentjan Bejtjas dhe u plagosën dy fëmijët e tij të mitur.
Gentjan Bejtja i cili dyshohet se ishte shënjestra e atentatit në fshatin Larushk të Krujës kishte përplasje me Durim dhe Valter Bamin si dhe Marklen Hakën. Dëshmitë e vëllezërve Durim dhe Valter Bami, e gjithashtu të Marklen Hakës kanë rezultuar jo të frytshme për Policinë e Shtetit.
Të tre janë liruar pasi u shoqëruan dje në Komisariatin e Krujës për të zbuluar më shumë detaje lidhur me atentatit që iu bë Gentian Bejtjas.
“Kam qenë në banesën time, e cila është e monitoruar me kamera. Nuk kam pasur konflikte me Bejtjan,“-mësohet se ka thënë Valter Bami para Policisë.
Po ashtu, edhe Marklen Haka ka pretenduar se ka qenë në banesën e tij dhe nuk ka lidhje me ngjarjen.
Bami dhe Bejtja kanë përplasje të forta, aq sa shënjestra e atentatit nuk qëndronte më në Larushkë në banesën e tij, por stehohej në Lezhë, nën ‘kujdesin’ e një tjetër grupi kriminal.
Sot pritet që të merret në pyetje edhe vetë shënjestra e atentatit.
