Janë zbardhur detaje të reja nga atentati i regjistruar mesnatën e kaluar në fshatin Larushkë të Fushë Krujës, ku dyshohet se ka qenë në shënjestër Gentjan Bejtja dhe si pasojë e breshërisë së kallashnikovit u vra kunati i tij Ramazan Sina si dhe u plagos djali i tij Alvi Bejtja,.
Burime pranë grupit hetimor bëjnë me dije se autorët kishin përdorur një automjet tip “Volkswagen Golf 5” për të kryer ngjarjen kriminale. Automjeti ishte vjedhur në Tiranë disa kohë më parë. Pas atentatit, autorët e braktisën dhe e dogjën makinën në zonën e Lapidarit në Tapizë.
Forcat policore që shkuan në vendngjarje e gjetën mjetin në flakë. Makina ishte pa targa dhe brenda automjetit u konstatuan 3 kallashnikovë. Këto armë u sekuestruan nga policia dhe u dërguan në laboratorin e Policisë Shkencore për t’u ekzaminuar.
Nuk është e qartë nëse në atentatin me 1 të vrarë dhe 2 të plagosur u përdorën 3 armët kallashnikovë. Kjo pritet të përcaktohet nga laboratori i Policisë Shkencore që do të kryejë testet balistike.
Deri më tani dyshohet se autorët kanë qenë 3 persona, dy në rolin e qitësit dhe një në rolin e shoferit. Po ashtu, ata dyshohet se janë ndihmuar dhe nga persona të tjerë për t’u larguar pas atentatit.
