Janë zbardhur detaje të reja nga aksidenti i regjistruar mëngjesin e sotëm në Tiranë, rreth orës 08:45, në rrugën “Ferit Xhajko”, pranë kryqëzimit të tregut, ku një urban i linjës së Unazës përplasi një motor.
Mësohet se në motorin me targë “TR 2A 37” po udhëtonin shtetasi H. Gj., bashkë me nipin e tij, 12 vjeç. Sipas dëshmimtarëve në vendin e ngjarjes, ata ishin të pajisur me kaska mbrojtëse. Mësohet se motori i tyre u godit nga mbrapa nga urbani i Unazës. Si pasojë e aksidentit, mbeti i plagosuri mituri, i cili u transportua në spital për të marrë ndihmë mjekësore.
Pas aksidentit, Policia Rrugore, mori në pyetje shoferin e mjetit të transportit publik me targë “AB 188 IY”, shtetasin me iniciale P. R.
Shkak dyshohet manovra e drejtuesit të autobusit për t’u afruar ne stacion, që ndodhet pranë vendit ku ndodhi aksidenti, por nuk përjashtohet edhe ndonjë devijim i drejtuesit të motorit. Grupi hetimor po punon për sqarimin e rrethanave të aksidentit.
