Eros Grezda, një nga afrimet më të mëdha të kësaj merkatoje vere, debutoi dje në fitoren e Partizanit ndaj Strugës me shifra minimale.
Sulmuesi nga Gjakova pati dy mundësi të mira, por goli nuk erdhi në këtë sfidë.
Në një intervistë për “Panorama Sport”, sulmuesi tregon për ardhjen te “demat”, teksa thekson se erdhi te kampionët për titullin dhe suksesin në arenën europiane.
Grezda, përse zgjodhët të transferoheshit te Partizani?
E kam deklaruar se arsyeja kryesore që unë jam në Shqipëri është se familja ime ka nevojë që unë të jem këtu. Gjithashtu edhe projekti i Partizanit më bindi, dua që ta shoh veten në këtë nivel dhe ta ndihmoj ekipin që të realizojë objektivat në Europë dhe në kampionat.
Luajti rol kryesor Zekiç për ardhjen tuaj këtu?
Po, me Zekiçin kemi një raport shumë të mirë. Kemi një kohë të gjatë që jemi në kontakt. E di shumë mirë se çfarë do ai. Më pëlqen shumë mënyra se si ai kërkon që ne të luajmë. Kam shumë besim se do të bëjmë mirë me të, sepse është një ndër trajnerët më të mirë që kam pasur.
Në vitet e fundit keni pasur probleme të shpeshta me dëmtimet. Jeni rikuperuar 100% për të ndihmuar Partizanin?
Kam pasur shumë probleme me dëmtimet, të cilat fatkeqësisht nuk i kam kaluar ende plotësisht, por me stafin e Partizanit po punojmë fort. Kemi një ekip shumë të mirë mjekësor, që po më qëndrojnë vazhdimisht pranë dhe për këtë jam shumë i lumtur, sepse kemi një marrëdhënie shumë të mirë dhe më përgjigjen për gjithçka.
Ju jeni përfolur edhe për një kalim të mundshëm te Tirana. Mund të shkonit atje po të mos ishte për Zekiçin?
Unë gjithnjë kam qejf që të dal kampion, Partizani është kampion i Shqipërisë. Kështu që vendosa të vij te kampionët.
Cili është synimi juaj në këtë sezon me Partizanin?
Dua që fillimisht të shkojmë sa më larg në garat europiane dhe më pas të shpallemi sërish kampionë të Shqipërisë.
Zekiçin e kemi parë të jetë me mjaft grintë në këto ditë të para. Ju që e njihni mirë, na tregoni ndonjë “sekret” të tij?
Zekiçi është pak a shumë ky që keni parë. Gjatë gjithë 90 minutave e menaxhon ndeshjen shumë mirë, por ka edhe temperament. Është pak agresiv. Është shumë i hapur me lojtarët në bisedat me ta dhe gjëja e vetme që kërkon nga ne është të japim gjithçka në fushë dhe besoj se nuk do ta zhgënjejmë.
Me cilin nga djemtë keni krijuar më shumë miqësi në këto ditë të para te Partizani?
Telushin dhe Alban Hoxhën i njoh që nga Kombëtarja, ku kemi qenë disa herë, si dhe Valentino Murataj.
Po në fushë, me cilin merreni vesh më mirë?
Nuk di të them. Unë kam raporte shumë të mira me të gjithë brenda dhe jashtë fushës. Kam parë që të gjithë më kërkojnë kur jam i lirë dhe besoj se me të gjithë do të kemi bashkëpunime shumë të mira në fushë.
