Derbi shqiptar në Champions League për femra. Goglat në Nion të Zvicrës vendosën që Vllaznia kampione e Shqipërisë dhe Hajvalia kampione e Kosovës të përballen mes tyre, për të përcaktuar cila do të vazhdojë aventurën europiane.
Të dy ekipet shqiptare bëjnë pjesë në grupin 7 të turit të parë të evenimentit më të rëndësishëm të futbollit për femra. Formati parashikon që 4 ekipet e secilit grup të luajnë me formatin e sfidave gjysmëfinale dhe më pas fituesi i grupit vendoset në ndeshjen finale.
Lajmi pozitiv për Vllazninë, kampione të shumëfishtë të Shqipërisë, është fakti se ndeshjet do të luhen në Shkodër. Ky ishte verdikti i shortit të hedhur nga UEFA, në mbledhjen me ekipet, për të përcaktuar qytetin ku do të zhvilloheshin përballjet e grupit me sistem grumbullimi.
“Loro Boriçi” do të jetë impianti mikpritës i tre ndeshjeve të Grupit 7. Stadiumi dhe tifozeria shkodrane do të jenë një shtysë më tepër për Vllazninë, që pas pjesëmarrjes historike në grupet e Champions gjatë sezonit të kaluar, tashmë do të provojë ta përsërisë atë arritje.
