Situata e zjarrit në fushën e mbetjeve në Vlorë vazhdon të jetë shqetësuese.
Teksa tymi helmues përhapet duke dëmtuar shëndetin e banorëve dalin në pah dhe kushtet e vështira të zjarrfikësve.
Siç shihet dhe në pamjet e siguruara nga FaxNews, punonjësit e zjarrfikëses nuk i kanë mjetet e duhura në dispozicion dhe janë duke punuar pa maska.
Banorët në zonën përqark, kanë thënë për gazetaren Afrovita Hysaj, se djegia ka nisur një ditë më parë në disa pika të vogla të ndryshme. Vendosja e zjarrit në pikën e grumbullimit të mbeturinave të Vlorës, dyshohet të jetë e qëllimtë.
Deri në këto momente, situata është jashtë kontrollit dhe pritet që flakët të vazhdojnë deri ditën e nesërme.
Zjarri ka nisur nga verilindja, duke u përhapur në jug me ndihmën e erës dhe nëse kjo situatë vazhdon, rrezikohen banesat e banorëve.
Pesë autobotë dhe 20 punonjës së zjarrfikësve janë duke punuar për shuarjen e flakëve, por situata është e rënduar pasi dhe era ndihmon që flakët të përparojnë.
