Besimtarët myslimanë festojnë ditën e sotme Kurban Bajramin. Mijëra besimtarë u mblodhën sot në sheshin “Skënderbej” në Tiranë për të falur namazin, i cili nisi në orën 06:00.
Besimtarët janë falur për mirësi, shëndet dhe fat për familjen e tyre.
Në këtë festë të sakrificës, besimtarët i luten Zotit për më shumë paqe, bekim dhe harmoni, ndërkohë që pas kryerjes së riteve të faljes Kurban Bajrami festa vijon më pas në çdo familje me drekën e madhe të Bajramit.
Simbolika e kësaj feste është bërja e një kurbani në shenjë falënderimi ndaj Zotit dhe shpërndarja e mishit të kurbanit të kryer për njerëzit dhe familjet në nevojë.
Kreu i Komunitetit Mysliman Shqiptar uroi besimtarët duke theksuar se shpreson që kjo ditë të shërbejë si reflektim ndërsa kërkoi që njerëzit duhet të jenë më të dashur dhe më miqësorë me njëri tjetrin.
“Të bëhemi më të fortë në besim ndaj Zotit, më të dashur e solidarë me njëri-tjetrin. T’u shtrijmë dorën e ndihmës atyre që kanë më shumë nevojë. I lutem Zotit që në botë të mbizotërojë paqja dhe prosperiteti mes popujve”, tha Spahiu.
Ai dha edhe një mesazh për situatën e tensionuar në Veri të Kosovës.
“I lutem Zotit që vëllezërit dhe motrat tona në Kosovë të gjejnë durimin dhe maturinë e duhur për të përballuar situatat e fundit të tensioneve dhe provokimeve në Veri të Kosovës”, deklaroi ai.
Lexo edhe:
Nga Korça në Fier, besimtarët myslimanë falin namazin në sheshe e xhami (FOTO)
