Shkon në tre numri i largimeve nga Erzeni pas përfundimit të sezonit 2022-2023. Pas shitjes së Adnard Mehmetit te Partizani, janë konfirmuar dje edhe largimet e sulmuesit Dejvid Kapllani dhe mesfushorit Elvis Kovaçi. Dy lojtarët kanë biseduar me drejtuesit e klubit dhe nuk kanë gjetur marrëveshje për të vazhduar bashkëpunimin.
Kësisoj, palët janë ndarë me mirëkuptim dhe dy futbollistët pasi kanë marrë letrat, tashmë janë futbollistë të lirë për të vijuar karrierën në skuadra të tjera. Kapllani iu bashkua Erzenit në muajin janar pas disa viteve si pjesë e Teutës, teksa u aktivizua në 17 ndeshje dhe arriti të shënojë një gol në KastriotiErzeni 2-2.
Nga ana tjetër, Kovaçi gjithashtu erdhi në janar dhe luajti vetëm 9 herë me Erzenin në pjesën e dytë të sezonit. Tashmë te shijakasit nuk mund të flitet ende për ndonjë përforcim të mundshëm, pasi drejtuesit nuk kanë vendosur se kush do të jetë trajneri i ri.
Me emërimin e këtij të fundit, atëherë do të ketë një ide të qartë edhe për merkaton. Shumica e futbollistëve që mbyllën sezonin janë në kontratë edhe për një vit me Erzenin, por gjithsesi edhe me një pjesë të tyre mund të rishikohen marrëveshjet dhe të ketë të tjera largime.
Parësore në këto momente në Shijak është zgjidhja e trajnerit që do të drejtojë skuadrën, e më pas miratimi i buxhetit për sezonin e ri, në bashkëpunim me bashkinë, si dhe ç’është më kryesorja nisja e stërvitjes dhe ku do të kryhet faza përgatitore.
Duket se pezull nuk ka mbetur vetëm çështja e stafit teknik, pasi edhe në stadiumin “Tofik Jashari” nuk kanë nisur punimet për projektin që u miratua vitin e kaluar nga Bashkia Shijak. Erzeni duket i destinuar që edhe në sezonin 2023-2024 të luajë në “Niko Dovana” të Durrësit.
Justin Bespalla, ish-sulmuesi i njohur shijakase, që ka bërë emër në Kategorinë Superiore si pjesë e Teutës dhe Erzenit dy dekada më parë, ka bërë një apel për drejtuesit e klubit në rrjetet sociale.
“Prapë në gjumë të thellë, pa ide të qarta dhe pa vizion për futbollin. Më vjen çudi si nuk punohet për një strategji afatgjatë. Pengesat nuk duhet t’ju ndalojnë. Nëse hasni në një mur, mos u ktheni dhe të dorëzoheni. Kuptoni se si ta kaloni këtë mur, të kaloni përmes tij apo të punoni rreth tij”, shkruante ndër të tjera Bespalla, i cili ka pasur në sezonin e fundit tek Erzeni edhe djalin e tij, Kristi Bespalla.
