Presidenti i Bjellorusisë, Alexander Lukashenko, duke folur sot për negociatat pas të cilave u ndal rebelimi në njësitë paraushtarake mercenare Wagner në Rusi, tha se lideri i atij formacioni Yevgeny Prigozhin u betua se qëllimi i tij nuk ishte gjakderdhja dhe se pas disa raunde negociatash, ai përfundimisht hoqi dorë nga kërkesat fillestare, njoftoi agjencia shtetërore bjelloruse Belta.
Lukashenko theksoi se presidenti rus Vladimir Putin ishte i përgatitur për t’i dhënë fund pamëshirshëm rebelimit, por se ai e kishte bindur atë të priste derisa të përpiqej të fliste me Prigozhin. “Ai m’u përgjigj: “Shiko, Sasha, është e kotë. Ai as nuk dëshiron të përgjigjet në telefon, nuk do të flasë me askënd”, tha Lukashenko.
Ai thotë se e ka pyetur Putinin se ku është Prigozhin dhe ai është përgjigjur se është në Rostov.
“Unë i thashë, në rregull, një paqe e keqe është më e mirë se çdo luftë. Merreni qetë. Do të përpiqem të kontaktoj me të. Dhe ai më tha përsëri, ‘është e kotë’. Unë i thashë, ‘OK, prit”, zbuloi Lukashenko.
Presidenti i Bjellorusisë zbuloi se gjenerali Yunus-Bek Yevkurov luajti një rol të madh në organizimin e negociatave dhe se drejtori i Shërbimit Federal të Sigurisë Ruse, Alexander Bortnikov, fillimisht mori pjesë në bisedime. Negociatat filluan rreth orës 11:00 kur Yevkurov telefonoi Prigozhin dhe e pyeti nëse donte të fliste me Lukashenkën.
“Yevgeny ishte plotësisht euforik. Në fillim folëm vetëm sharje për rreth 30 minuta. Më vonë e analizova. Numri i fjalëve të sharjeve ishte dhjetë herë më i madh se numri i fjalëve normale. Ai tha se i vinte keq dhe filloi të shante”, thotë Lukashenko.
Ai thotë se po mendonte se çfarë t’i thoshte Prigozhinit për të filluar negociatat.
“Djemtë sapo ishin kthyer nga fronti, panë mijëra shokë të vdekur. Ata ishin jashtëzakonisht të pakënaqur. Sidomos komandantët dhe me sa kuptova, ata kishin një ndikim të fortë te vetë Prigozhin. Këtë e kuptova paraprakisht. Po, ai u soll si një hero, por, e dini, ai ishte nën presion dhe ndikim nga ata që komandonin njësitë sulmuese dhe që po vëzhgonin ato viktima dhe vdekje. Kështu që, në atë situatë, unë fola me të kur ai shkoi vetëm për një sekondë në Rostov dhe ishte gjysmë i çmendur”, kujtoi ai detajet e liderit bjellorus.
Siç shtoi ai, situata në Rusi mund të ndikojë edhe në Bjellorusi, prandaj ai po përpiqej të bindte Prigozhin që të ndalonte trupat e tij.
“U përpoqa ta bindja për një kohë të gjatë. Dhe në fund i thashë: “E di, mund të bësh çfarë të duash, por mos më ofendo. Brigada është përgatitur për transferim në Moskë. Ne do të mbrojmë Moskën si në 1941. Ju lexoni libra. Ju jeni një person i arsimuar dhe i zgjuar. Kjo situatë nuk do të prekë vetëm Rusinë. Nëse trazirat do të ishin përhapur në të gjithë Rusinë dhe nëse do të kishte parakushte kolosale për këtë, ne do të ishim të radhës”, tha Lukashenko.
