Policia e Shtetit ka bërë bilancin e 72 orëve të fundit.
Sipas njoftimit të uniformave blu mësohet se përgjatë këtyre orëve janë realizuar 7 operacione antidrogë në qarqe të ndryshme të vendit, duke ndërhyrë në disa plantacione kanabisi e duke ndaluar shpërndarjen e kokainës.
Operacionet janë zhvilluar në Shkodër, Mirëditë, Krujë, Dibër, Tiranë, dhe Durrës, ku janë gjetur parcela me bimë narkotike dhe janë asgjësuar qindra fidanë kanabisi.
Ndërkohë janë arrestuar dhe shpallur në kërkim autorët e implikuar në kultivimin e këtyre bimëve.
✅7 operacione antidrogë goditën kultivimin e mijëra bimëve narkotike, në 4 qarqe të vendit, goditën një grup kriminal që shpërndante kokainë në kryeqytet dhe ndërthurjen e kësaj veprimtarie kriminale me mbajtjen pa leje të armëve të zjarrit.
✔️Në Shkodër, në Malësi të Madhe dhe në Fushë Arrëz, si rezultat i fazës së gjashtë të operacionit “Alpe të pastra”, u asgjësuan 4999 bimë narkotike cannabis sativa, u vu në pranga njëri nga autorët e dyshuar të kësaj veprimtarie kriminale, si dhe u shpallën në kërkim 5 të tjerë.
✔️Në Mirditë, si rezultat i fazës së 18-të të operacionit “Imazhi”, u asgjësuan 1664 fidanë narkotikë cannabis sativa dhe u vunë në pranga 2 bashkautorë të dyshuar të kësaj veprimtarie kriminale.
✔️Në Shkodër, si rezultat i fazës së dytë të operacionit “Postriba”, u asgjësuan 1300 bimë narkotike cannabis sativa të mbjella në banesën e një 54-vjeçari. Bimët narkotike i mbronin me dy armë zjarri, 54-vjeçari dhe nipi i tij, të cilët u neutralizuan nga Policia dhe u vunë në pranga. 2 armët e zjarrit u sekuestruan si provë materiale.
✔️Në Krujë, si rezultat i fazës së 19-të të operacionit “Territor i pastër”, u asgjësuan 362 bimë narkotike cannabis sativa.
✔️Në Dibër, si rezultat i fazës së tretë të operacionit “Kreshta të pastra”, u asgjësuan 233 bimë narkotike cannabis sativa dhe u vu në pranga një shtetas që u kap në flagrancë duke ujitur këto bimë.
✔️Në Tiranë, operacioni “Rapid Dispatch” goditi një grup kriminal, të përbërë nga 4 shtetas që shitnin doza kokaine në zonën e Ish-bllokut. 2 shtetas u arrestuan dhe 2 shtetas u shpallën në kërkim. Kokainë, para, automjete dhe celularë u sekuestruan si provë materiale.
✔️Në Durrës, si rezultat i operacionit “Qindra”, u kapën dhe u vunë në pranga 2 shtetas që shitnin doza të lëndës narkotike kokainë, në lokalet e natës, në zonën e plazhit. Një sasi lëndë narkotike kokainë e ndarë në 150 doza të gatshme për shitje, një automjet, një peshore elektronike dhe 4 celularë u sekuestruan në cilësinë e provës materiale.
✔️Gjithashtu, në Tiranë u vunë në pranga 2 shtetas që shitnin në doza, lëndë narkotike kokainë dhe kanabis”,- njofton policia.
Gjithashtu njoftohet se janë vënë në pranga disa shtetas, pasi akuzohen për shit-blerje narkotikësh, si dhe janë bllokuar disa mjete lundruese në kuadër të mbarëvajtjes së sezonit turistik.
“✅Intensifikimi i punës, kontrolleve dhe monitorimit, për mbarëvajtjen e plotë të sezonit turistik 2023, sollën rezultate të prekshme për qytetarët dhe pushuesit.
✔️11 mjete të ndryshme lundruese u bllokuan nga Dhërmiu në Shkodër, pasi lundronin në kundërshtim me rregullat dhe ligjet në këtë fushë. Shtetasit përgjegjës për to, u ndëshkuan me masa administrative 10 000-300 000 lekë të rinj.
✔️4 administratorë subjektesh u proceduan penalisht, pasi kishin vendosur në Porto Romano, 836 shezlongë dhe çadra, të paautorizuar.
✔️6 shtetas që shqetësonin banorët dhe pushuesit, me muzikë të lartë në 3 lokale në Vlorë dhe në Drimadhes, u proceduan penalisht.
✔️Në Lezhë u vu në pranga një 55-vjeçar, pasi ndërtoi pa leje në plazhin e Tales, një objekt dykatësh me dhoma për akomodimin e pushuesve.
✔️Në Vlorë u vu në pranga një 46-vjeçar, pasi ndërtoi pa leje në zonën e plazhit në Radhimë, një mur rrethues.
✔️Policia e Kukësit iu shkon në ndihmë 2 turistëve holandezë që kishin mbetur të bllokuar, në një terren tejet të thepisur dhe me dëborë, në mes të malit të Jezercës dhe Bjeshkëve të Namuna”,- njofton policia.
Bëhet me dije gjithashtu se janë parandaluar edhe disa raste kriminale në qytete të ndryshme të vendit.
“✅Reagimi i shpejtë dhe profesional i Policisë në qarqe, parandaloi dhe goditi një sërë ngjarjesh dhe rastesh kriminale.
✔️Në Gjirokastër, në kuadër të operacionit “Road Guard 65”, u arrestua një 35-vjeçar dhe iu procedua penalisht bashkëjetuesja, pasi kishin përfituar 5500 euro për transportimin e 11 emigrantëve. Një 20-vjeçar i kërkuar për të njëjtën veprimtari kriminale, u lokalizua dhe u ndalua nga Policia e Gjirokastrës.
✔️Në Kamzë, në kuadër të operacionit “The dispute”, u sekuestrua një pistoletë që mund të përdorej në një konflikt midis 2 shtetasve të cilët u shpallën në kërkim.
✔️Në Krujë u parandalua përshkallëzimi i mëtejshëm i një konflikti me send të forta dhe u arrestua një nga shtetasit e dyshuar të implikuar në këtë konflikt.
✔️2 shtetas që hynë në paautorizuar në oborrin e një shkolle publike, në Berat, u arrestuan pasi kundërshtuan me dhunë punonjësit e Policisë që ndërhynë për t’i larguar”,- përfundon Policia.
