Ish-kryebashkiaku i Kukësit Safet Gjici është arrestuar një javë pas publikimit të një video-skandali seksual.
Për të është caktuar masa e sigurisë “arrest me burg” nga gjykata e Posaçme pas një kërkese të SPAK.
Masa është ekzekutuar këtë pasdite, teksa Gjici është arrestuar në një lokal pranë shtëpisë së tij në Tiranë.
Vënia në pranga vjen disa ditë pas publikimit të një videoje intime, ku Gjici shfaqej duke kryer marrëdhënie seksuale me një grua më të re në moshë se ai, në zyrën e punës. Më pas në media u publikuan të tjera pamje që tregonin se si Gjici i premtoi vajzës në fjalë një projekt për firmën e saj nga Bashkia Kukës.
Mësohet se arrestimi dhe akuza e ngritur nga SPAK për korrupsion pasiv ndaj Gjicit lidhen me këtë ngjarje.
Pas publikimit të pamjeve, Gjici njoftoi dorëheqjen përmes një postimi në rrjetet sociale. Ai tha se me vajzën ka pasur një marrëdhënie jashtëmartesore për disa kohë, ndërsa pretendoi se “ra pre e një kurthi të përgatitur me detaje nga e njëjta dorë njerëzish me të cilët u përballa në zgjedhje”.
