Një sasi monetare prej 21 800 euro janë sekuestruar nga policia në Kapshticë, që ka proceduar poseduesin për mosdeklarim të parave.
Efektivët kanë kaluar në vijën e dytë në dalje të Republikës së Shqipërisë për kontroll të imtësishëm një automjet tip “Opel”, me drejtues F. D., 40 vjeç, banues në Selanik, Greqi.
Policia njofton se gjatë kontrollit, në çantën e dorës së 40-vjeçarit u gjetën 21 800 euro që ai nuk i kishte deklaruar siç përcaktohet në ligj. Shuma monetare u sekuestrua në cilësinë e provës materiale.
Veprimet e mëtejshme procedurale u kryen nga specialistët për Hetimin e Krimeve Ekonomiko-Financiare, të Drejtorisë Vendore të Policisë Korçë, të cilët referuan materialet në Prokurori, ku filloi procedimi penal në gjendje të lirë për shtetasin F.D.
