Ka ndërruar sot jetë në moshën 91-vjeçare ikona e sportit të Kosovës, Arsim Fehmiu.
Ai ishte një prej themeluesve të Fakultetit të Kulturës Fizike në Prishtinë dhe ka vënë bazat e katedrës së futbollit, basketbollit, hendbollit e volejbollit në këtë fakultet.
Si trajner i futbollit, Fehmiu kishte punuar në klubin e njohur nga Kroacia, Rijeka.
Arsim Fehmiu kishte udhëhequr edhe juniorët e shtetit të dikurshëm federativ, Jugosllavisë. Ai ishte i angazhuar edhe në Kosovë, në pozita e periudha të ndryshme.
I ndjeri ishte shpërblyer me shumë çmime e mirënjohje gjatë karrierës së tij të gjatë në sport, por edhe në mësimdhënie.
Me këtë rast, Federata e Futbollit të Kosovës (FFK) ka shprehur ngushëllimet më të sinqerta drejt familjes Fehmiu.
“Profesor Arsim Fehmiu do të mbetet gjithmonë një figurë e shquar e sportit në Kosovë dhe një burrë i madh i arsimit. Kontributi i tij i jashtëzakonshëm në zhvillimin e sportit, veçanërisht futbollit, do të kujtohet gjithmonë me respekt dhe admirim. Ai ishte një shembull i vërtetë i përkushtimit ndaj atdheut dhe edukoi breza të tërë me pasionin e tij për sportin”.
