Dy persona kanë mbetur të plagosur gjatë një konflikti që ka ndodhur në Krujë këtë të Hënë, gjatë së cilit është qëlluar me armë zjarri. Policia konfirmoi se personat e lënduar nuk kanë marrë plagë të shkaktuara nga armë zjarri, por nga goditje me sende të forta.
Sipas një rindërtimi paraprak të ngjarjes, rreth orës 19:55, në një dyqan lulesh në pronësi të vëllezërve D. Gjoka dhe K. Gjoka ka ndodhur një konflikt me sende të forta mes këtyre shtetasve dhe katër vëllezërve: Roland, Besmir, Blenard dhe Ahmet Rryçi. Këta të fundit, gjatë konfliktit dyshohet se kanë qëlluar në ajër me armë zjarri, e më pas janë larguar.
Nga përdorimi i sendeve të forta janë dëmtuar pronarët e dyqanit të luleve.
Shërbimet e Policisë po krehin zonën me qëllim kapjen e autorëve të dyshuar, ndërsa grupi hetimor po punon për sqarimin e rrethanave të konfliktit, njofton policia.
