Nga Boldnews.al
Dy biznese të mëdha të sipërmarrësit Lirim Fezollari vijojnë të pashqetësuara aktivitetin e tyre tregtar, megjithë procesi i privatizimit të truallit mbi të cilin ato janë ndërtuar ka kaluar nëpërmjet një procesi abuziv, ku janë përfshirë zyrtarë e ish-zyrtarë të lartë të qeverisë së Edi Ramës.
Qendra tregtare “Emerald”, në zonën e njohur si “5 Maji”, si edhe parku i lojërave “Latitude”, i ngritur pranë zonës së njohur si “Pallati me Shigjeta”, të dyja në Tiranë, funksionojnë në trojet që dikur kanë qenë në pronësi të ndërmarrjes shtetërore “Buka” sha.
Struktura e Posaçme Anti-Korrupsion (SPAK) ka nisur një hetim penal për “shpërdorim detyre” lidhur me procedurën e privatizimit të trojeve të “Buka” sha.
Nga ana tjetër, prokurorët e posaçëm po verifikojnë edhe për mundësinë e kryerjes së veprës penale të korrupsionit dhe nën lupën e tyre janë dy personazhe-ish-ministri Arben Ahmetaj dhe biznesmeni Lirim Fezollari.
Gjithësesi, pavarësisht se hetimi po zhvillohet prej muajsh dhe faktet e privatizimit skandaloz janë konfirmuar më herët gjatë një procesi gjyqësor administrativ, SPAK ende nuk ka vendosur të kryejë sekuestro preventive mbi trojet e tjetërsuara në mënyrë anti-ligjore dhe, rrjedhimisht bizneset fitimprurëse të Fezollarit vijojnë të gjenerojnë të ardhura të majme për biznesmenin.
Në një proces të ngjashëm hetimor, SPAK ka vendosur nën sekuestro Portin e Limionit, në Sarandë, në kuadër të një hetimi që po zhvillohet mbi zyrtarë e ish-titullarë të Ministrisë së Mbrojtjes, lidhur me procedurat për dorëzimin e këtij aseti të ushtrisë në duart e dy prej biznesmenëve më të fuqishëm vendas.
Ndërkohë që për bizneset e Fezollarit, duket se SPAK-u po merr më shumë kohë për të vlerësuar nëse duhet vendosur sekuestro ose jo.
Privatizimi skandaloz
Në vitin 2015, Ministria e Financave, nën drejtimin e Shkëlqim Canit dhe Ministria e Zhvillimit Ekonomik, e drejtuar nga Arben Ahmetaj, nisën procedurat për privatizimin e mbi 46 përqind të aksioneve shtetërore në ndërmarrjen e prodhimit të bukës, të ndërtuar në kohën e komunizmit.
Aksionet u blenë nga biznesmeni Fezollari, i cili zotëronte më herët edhe rreth 40 përqind të aksioneve të tjera të shoqërisë publike. Pas procesit të privatizimit, Lirim Fezollari shndërrohet në aksionerin maxhoritar, me rreth 86 përqind të aksioneve.
Procesi i privatizimit kaloi në një seri shkeljesh ligjore. Në nëntor të vitit 2018, Ministri i Zhvillimit Ekonomik të asaj kohe, Arben Ahmetaj, urdhëroi anulimin e një ankandi të zhvilluar në vitin 2015, për shitjen e rreth 46 përqind të aksioneve të kompanisë publike “Buka” sha tek biznesmeni Lirim Fezollari, i cili zotëronte edhe 40 përqind të tjera të aksioneve.
Vendimi për anulimin e këtij ankandi ishte në vijim të një vendimi të formës së prerë, të marrë më herët nga Gjykata e Apelit Administrativ. Por, ky vendim, megjithëse ka firmën dhe vulën e ministrit, nuk rezulton të jetë reflektuar zyrtarisht.
Të paktën, urdhëri i Ahmetaj nuk ka mbërritur dhe nuk është reflektuar në Qendrën Kombëtare të Biznesit (QKB). Nga një verifikim i kryer së fundmi nga “Boldnews.al” rezulton se biznesmeni Fezollari vijon të zotërojë ende 89.4 përqind të aksioneve, ku përfshihen edhe ato të blear në ankandin e zhvilluar nga Arben Ahmetaj në vitin 2015.
Të jetë thjesht një lapsus, harresë apo e qëllimshme? Pikëpyetjet janë të forta, sidomos duke mbajtur në konsideratë faktin se biznesmeni Lirim Fezollari, si aksioneri kryesor i “Buka” sha, ka shitur një pjesë të konsiderueshme të aseteve tek kompania“Tobacco Holding Group”, e cila është në pronësi po të tij.
Në foto: Biznesmeni Lirim Fezollari vijon të jetë ende aksioneri maxhoritar me 89.4 përqind të aksioneve të “Buka” sha
Në truallin ku gjendej ish-furra elektrike e ndërmarrjes publike në zonën e “5 Majit”, kompania “Tobacco Holding” ka ndërtuar qendrën tregtare “Emerald Mall”.
Ndërsa në truallin e “Buka” sha, në zonën pranë “Pallatit me Shigjeta”, kompania e Fezollarit ka ndërtuar qendrën e lojrave “Latitude”.
Këto investime janë kryer mbi troje, të përfituara nëpërmjet një procedure ankandi të shpallur tërësisht të paligjshme nga Gjykata.
Pikërisht, SPAK-u po heton mbi këto veprime dhe në bazë të kallëzimit të trashëgimtarëve të ish-pronarit Myderizi, të cilët kanë fituar të drejtën e rikthimit të truallit, ku gjendej më parë furra elektrike e “Buka” sha, në zonën e “5 Majit”.
Ankandi i paligjshëm
Historia e shitjes së aksioneve dhe aseteve të kompanisë shtetërore “Buka” sha mund të përbëjnë një prej skandaleve më të rënda të qeverisë së Edi Ramës.
Struktura e Posaçme Kundër Korrupsionit (SPAK) po kryen hetime për shpërdorim detyre dhe korrupsion.
Deri më tani, prokurorët e posaçëm kanë marrë në pyetje ish-ministrin e Financave, Shkëlqim Cani, biznesmenin që bleu në një ankand të dyshimtë pjesën më të madhe të aksioneve të kompanisë “Buka” sha, si edhe zyrtarë të ndryshëm të Ministrisë së Financave.
Ndërkohë, siç ka raportuar më herët “Boldnews.al”, në fokus të hetimeve të SPAK-ut është edhe ish-ministri dhe njëkohësisht ish-zv.kryeministri Arben Ahmetaj, i cili ka ndjekur procedurat e ankandit, të zhvilluara në vitin 2015.
Në Gusht të vitit 2015, Ministria e Zhvillimit Ekonomik, nën drejtimin e Ahmetaj, shiti 45.9 përqind të aksioneve që zotëronte tek “Buka” sha, tek biznesmeni Lirim Fezollari, i cili zotëronte në atë kohë edhe rreth 40 përqind të aksioneve të tjera.
Pas kësaj shitjeje, mbi trojet e “Buka” sha, përfshirë edhe në atë të njohur familjes Myderizi, kompania e Fezollarit ndërtoi qendër tregtare.
