Personat që shihni në fotot e mëpshtme janë Naim, Merita dhe Ermal Pacolli, familja nga Kosova e cila humbi jetën në aksidentin tragjik të regjistruar të shtunë në Maqedoninë e Veriut.
Ata po udhëtonin me mjetin e tyre tip “BMW” në aksin rrugor Shkup –VK Bllacë, rreth orës 15:20, kur u përplasën me një automjet tip “Volkswagen Turan” dhe pas përplasjes përfunduan në lumin Lepenc. Bashkë me ta ndodhej dhe anëtari tjetër i familjes, Shkëlqim Pacolli, 21 vjeç, por në momentin e aksidentit ka kërcyer nga makina dhe fatmirësisht ka arritur të shpëtoj dhe aktualisht është duke u trajtuar në Spitalin “8 shtatori” në Shkup.
Kërkimet për gjetjen e tre viktimave nisën pasditen e së shtunës, ku përveç ekipeve të shpëtimit të Maqedonisë së Veriut, në kërkime ndihmuan edhe pjesëtarët e Forcave Speciale të Kosovës dhe disa vullnetarë. Sot, pasdite u bë e mundur nxjerrja e makinës tip “BMW” nga lumi Lepenc, bashkë me tre viktimat brenda në mjet.
Fotot e viktimave i ka publikuar në rrjetet sociale biznesmeni dhe politikani nga Kosova, Behgjet Pacolli, i cili i kishte të afërm. “Viktimat e familjes Pacolli, të prehen në paqe në atdhe. Ngushëllimet e mia më të sinqerta familjarëve! Një tragjedi që na prek të gjithëve”, ka shkruar Pacolli.
