Janë zbardhur detaje të reja nga aksioni i përbashkët i Policisë Kriminale në bashkëpunim me Njësinë Speciale Policore “Joint Shield” pranë ambasadës amerikane në Tiranë, Policinë Kufitare të Rinasit dhe Policisë Korçë, ku pas hetimeve u lëshua urdhër-arresti për dy persona.
Burime konfirmojnë se në pranga janë vënë dy korçarët Daniel Morava dhe Guri Pejo. Për këtë të fundit gjykata ka caktuar masën e sigurisë “Arrest në shtëpi”, për shkak të moshës. Dyshohet se ata janë pjesë e organizatës jofitimprurëse “Agjencia e Investigimit Stop Krimit”, që drejtohet nga Fatmir Sena. Të arrestuarve ju gjetën, kartat e anëtarësisë së kësaj agjenci dhe vizat diplomatike të falsifikuara.
Hetimi ndaj tyre nisi në muajin prill, kur policia Kufitare e Rinasit, në bashkëpunim me Njësinë Speciale Policore “Joint Shield”, arrestuan shtetasen shqiptare D. I., 56 vjeçe, në tentativë për të udhëtuar drejt SHBA-së, me një pasaportë diplomatike false, për të cilën pretendonte se ishte e lëshuar nga kjo OJF.
Lidhur me aksionin e fundit, policia e Shtetit së bashku me Ambasadën Amerikane në Tiranë, kanë njoftuar se janë në verifikim e sipër dhe 4 persona të tjerë. Pritet që në vijim hetimi mbi këtë rast të falsifikimit të vizave diplomatike të misionit Amerikan, të hedhë dritë për implikimin e personave të tjerë.
Mësohet se organizata “Agjencia e Investigimit Stop Krimit”, shpesh herë është bërë objekt i hetimeve, pasi persona të ndryshëm janë arrestuar duke u hequr si agjentë policorë në situata të ndryshëm. Të prangosurve, uniformat blu iu kanë gjetur karta anëtarësie dhe “deduktivë policorë” që dyshohet se janë lëshuar nga “Agjencia e Investigimit Stop Krimit”.
