Pesë persona janë arrestuar për shpërndarje droge dhe një tjetër është shpallur në kërkim nga policia e Tiranës.
Sipas bluve, të arrestuarit, në bashkëpunim me njëri-tjetrin, shpërndanin kokainë në lokalet e natës në Tiranë. Policia ka sekuestruar rreth 1 kg e 100 gr lëndë e dyshuar narkotike kokainë, 3 automjete, 9 aparate celulare, 710 euro si dhe 149 000 lekë.
Aksioni i koduar “Moncler” erdhi pas disa muajsh hetime.
Në kuadër të këtij operacioni u bë arrestimi në flagrancë i shtetasve: Ledjo Gashi, 26 vjeç, Ergi Saliu, 29 vjeç, të dy banues në Shijak, Brajan Lala, 24 vjeç, Erges Nexhipi, 34 vjeç, të dy banues në Durrës, dhe Mario Dema, 32 vjeç, banues në Rrashbull.
Gjithashtu u shpall në kërkim D.B., 34 vjeç.
“Në rrugën dytësore Tiranë-Durrës, në afërsi të fshatit Marikaj, shërbimet e Policisë kanë lokalizuar shtetasit e lartpërmendur, dhe gjatë kontrollit të njërit prej automjeteve të tyre, u gjet një pako me lëndë të dyshuar narkotike të llojit kokainë, me peshë rreth 1 kg e 100 gr.
Nga verifikimet e kryera ka rezultuar se këta shtetas në bashkëpunim me njëri-tjetrin, siguronin lëndë të dyshuar narkotike të llojit kokainë në Durrës, dhe më pas e shisnin atë kryesisht në lokale të natës, në Tiranë. Në cilësinë e provës materiale u sekuestruan rreth 1 kg e 100 gr lëndë e dyshuar narkotike kokainë, 3 automjete, 9 aparate celulare, 710 euro si dhe 149 000 lekë”, njoftoi policia.
Nga pamjet e arrestimit të shpërndarë nga policia, shihet se blutë arrestojnë në një lokal dhe jashtë tij disa prej të dyshuarve. Në video shquhen efektivët të cilët u vënë prangat të dyshuarve, tashmë të shtrirë përdhe.
